香港法律改革委員會昨日召開記者會發表報告書，建議政府立例管制傳媒報道他人私隱，但有關侵犯公眾人物私隱權的部份，該會的建議涉及不少灰色地帶。周潤發昨日表示新聞自由與個人私隱同樣重要，直指立法管制是「嘥氣」，而關之琳則贊成立例，認為此舉可以保障藝人的私生活。
香港法律改革委員會昨日在新聞處舉行記者會，發表《傳播媒介的侵犯私隱行為報告書》和《侵犯私隱的民事責任報告書》，向政府建議成立自律委員會，管轄報刊報道他人私隱，以及提出應立法管制傳媒對他人私隱之報道，其中提及侵犯他人私隱的範圍，包括在未經當事人同意及在不合法情況下，不可監視他人活動、開啟他人私人物品及私人紀錄，甚至不可公開他人身為天才、有錢人或向慈善機構捐款等事項或身份，更不可無理宣揚當事人的私生活。
有太多灰色地帶難兼顧平衡
不過，由於公眾人物的報道涉及不少灰色地帶，若此例一旦成立，報道新聞時勢必出現諸多限制。對於法律改革委員會提出的限制報道他人私隱建議，娛樂圈中人對此反應不一。
周潤發昨日就此事接受本報訪問時在電話中說：「我已經睇咗新聞，知道啦，我覺得個人私隱同新聞自由係同樣重要嘅，𠵱家法改會話要立例保障，其實中間存在太多灰色地帶，好難兼顧平衡。好似歐美咁先進、文明嘅國家，都唔能夠取得最好嘅平衡點啦，美國總統都唔一定有絕對嘅個人私隱。我覺得保障個人私隱呢件事係冇得立例管制嘅，嘥氣啦！」
只係鍾意報道好嘢諗法自私
發哥續說：「我都係受害人，亦試過有狗仔隊喺我屋企門口企足一個星期，確係幾煩擾嘅事。我都明白𠵱家嘅傳媒競爭好激烈，但亦希望大家能夠自律，唔好濫用新聞自由。」
而杜汶澤昨日在電話中亦表示對這個建議不完全支持，亦不完全反對，他說：「藝人一向只係鍾意傳媒報道佢啲好嘢，同時好憎傳媒報道佢啲唔好嘢，但呢個諗法就比較自私，你想人哋知你嘅好嘢，但人哋都想知你啲衰嘢嘅嘛，最重要係知情權，我唔係維護報界嘅利益，但冇理由你捐錢就寫得，走去叫雞就唔寫得。」
藝人呢項職業並唔等於賣身
杜汶澤又說：「身為公眾人物，人哋有權知你嘅好與壞，人哋對你有興趣，都係因為鍾意你，通過傳媒嚟了解你，並唔係一件壞事，娛樂新聞始終係娛樂，有時唔使太認真喎。不過知情權唔代表可以騷擾，最緊要知嘅過程係點，如果偷拍嘅過程係冇滋擾嘅情況下發生，我覺得作為藝人又唔需要太激動，但有時追車就真係好危險，好似徐濠縈大肚都重要追住佢嚟影嘅，就係騷擾囉。」
另一方面，關之琳昨日在金鐘出席TOM集團記者會時，則對立例保障私隱之建議大表支持，認為是一件好事，她說：「藝人係一種職業，呢項職業並唔等於賣身，以後可以放心啲，做藝人可以有保障。𠵱家私生活唔夠，真嘅就話啫，唔係嘅話呢隻死貓好難食。」
採訪：陳月媚、張止寒、何永寧
