豪宅今年當旺，信和希望趁年底前，推出上水洋房御林皇府，售樓紙雖未到手，噚日先開放其中一間四千幾呎嘅示範屋畀傳媒參觀。
發展商話，個盤以英國貴族概念設計，噚日特別準備咗一架一九六八年出廠，由英國入口嘅ClassicBenz做道具。呢部車來頭唔小，全港只得五架，何東家族、周潤發同信和黃氏家族各有一架。
屋苑範圍內重用埋倫敦地方命名，噚日開放嘅示範屋，就係肯辛頓徑二十號，四千二百幾呎，花園連天台就有三千幾呎。間屋夠晒大之餘，客飯廳樓底重有十五呎一吋高，空間感十足，一派英式大宅風格。遲啲重有兩間五千幾同七千幾呎嘅示範屋開放，真係要拭目以待。
信和營業部總經理韓家輝話，間屋裝修費要近六百萬，𠵱家接受預約睇樓，意向呎價維持一萬。佢重話，近排有四五個客洽租，所以都會考慮吓保留收租，租金會參考集團赤柱ThreeBays。
今年樓市遇上大升浪，地產代理豐收。龍頭代理中原地產噚日公布，首十一個月，淨係香港工商舖及住宅部，營業額十六億，比舊年全年九億六增加六成七。主席施永青話，全年目標十八億，直迫九七樓市高峯期嘅二十億，明年就朝向二十三億九目標進發。
港島最突出，佔營業額三成一，有五億，較舊年嘅兩億八，勁增近八成。九龍佔三億六。
目前，中記前線員工三千人，若以營業額十六億，拆帳三成計算，平均每人年薪十六萬，月薪萬三。分行由舊年一百六十七，增至今年二百二十四。
另外，美聯物業話，今年過一千萬營業額嘅分行，有三十五間，比舊年十五間增逾一倍。工商舖排頭位，其次係南區紅山半島及元朗加州分行。
上個月，以兩億一買入尖沙嘴加連威老道連城閣一批舖位嘅買家，證實係喜劇泰斗周星馳。
除咗忙於拍戲，佢久不久都會執番幾件豪宅及旺舖，早排投資旺角先達廣場地舖，一買一賣，勁賺千三萬。
年初更以三億二，買入山頂天比高。呢顆笑星都可算係影藝界最勇猛嘅買家。
最近忙於宣傳新戲《功夫》嘅星爺，雖然投資地產唔算內行，不過，入市親力親為。
好似買連城閣咁，據聞喺拍板前，曾經帶同一隊專業人士睇樓，左度右度，相當細心，甚至喺其中一個由髮廊租用嘅舖位逗留好耐，被人誤以為想幫襯。
今次周星馳大手買舖，係用公司登記，間公司重有埋星媽凌寶兒與胞妹周星霞個名。
音樂係世界共通語言，豪宅盤舉辦音樂會，既可提高形象，又可順道做宣傳，一舉兩得。薄扶林貝沙灣與火炭晉名峰都有咁做。
深圳觀瀾高爾夫大宅，今個禮拜日招待傳媒，喺樓盤嘅露詩達區舉行音樂演奏會，請嚟鋼琴名家孔祥東、小提琴家呂思清，以及深圳交樂團表演，等大家可以感受吓嗰區獨特嘅迷人魅力。
講開音樂演奏會，本港尖沙嘴海港城港威大廈商場，今個禮拜日都有場鋼琴演奏會，集流行和古典音樂於一身，克羅地亞新世代年輕鋼琴演奏家MaksimMrvic，喺全亞洲首度展出價值過百萬嘅Rosenthal「瓷」善聖誕樹旁，利用Steinway&Sons九呎殿堂級嘅鋼琴現場彈奏。
樓市轉勢，投資者又開始入市，由一手逐漸擴至二手，大手掃貨有增無減。
利記顧偉瀚話，活躍北角區大型屋苑嘅資深投資者，最近先後掃入八個城市花園及和富中心單位，總值四千萬。市場人士話，買家係黎汝遠或有關人士。
最新買入嘅，有城市花園九座高層B，逾千呎，成交價近五百三十萬，每呎近四千九。另一個和富中心十座低層，千五呎，作價六百六十萬，呎價近四千三。
電郵地址：
