三杯酒下肚　大叫「我老婆」
馮仁昭四圍超：李亞鵬唱《IBelieve》冧王菲

劉嘉玲前日三十九歲生日，雖然當日要開工，男友梁朝偉亦未有現身，但夜晚嘉玲就喺深灣遊艇會開生日會，到場嘉賓星光熠熠，有張學友、林青霞、關之琳、葛優、梁家輝、吳君如、關秀媚、黎明、黃秋生同曾志偉等人，王菲同愛郎李亞鵬嘅出現，更加搶晒壽星女嘅風頭！

當眾互咀
王菲同李亞鵬嘅戀情已經白熱化，前晚佢兩個喺派對上表現極之親密，王菲亦唔介意喺班老友面前晒幸福，當眾同李亞鵬互咀。
而當李亞鵬喺台上唱快歌時，台下嘅王菲飲大兩杯，開心到係咁跳舞，李亞鵬重用國語同大家講話唔好意思，佢老婆醉咗！到王菲唱完歌，佢又叫愛郎唱首《IBelieve》畀佢聽，雖則李亞鵬唔多識，唱到一嚿嚿，但王菲依然好開心。
雖然嘉玲被王菲、李亞鵬搶風頭，但佢一啲冇介意，重喺會上跳舞唱歌。而其他嘉賓都好盡興，大部份都飲到啤啤夫，做咗醉貓嘅曾志偉重以粗口贈興，後來佢離場時想打電話，點知行冇兩步就已經瞓咗喺梳化度，要由朋友扶上車。而黎明嚟嗰陣自己揸車，點知走嗰陣變咗乘客。到噚日凌晨三點幾，嘉賓開始離場，壽星女劉嘉玲則殿後離開。

GiGi聖誕賣大包
梁詠琪（GiGi）下個禮拜會出新碟《娛樂大家》，由於大碟以娛樂做主題，所以GiGi特別為樂迷準備咗一份娛樂套餐，等大家可以喺聖誕玩個痛快。GiGi話：「呢次買我隻碟嘅歌迷，都可以得到海洋公園、保齡球場同溜冰場優惠券，重可以用優惠價訂購我喺下月主演嘅舞台劇嘅入場券。」

星爺榮升大學教授
周星馳近排經常去大學同大學生交流，佢日前終於正式受聘，做咗內地西南民族大學嘅客席教授，為影視表演專業科講學。佢早排演講完大受歡迎，全場學生更高呼要佢受聘「一萬年」，而星仔就話教授個名太抬舉佢，頻頻話「唔好意思」。

林冰今日舉殯
專欄作家林冰上月尾逝世，噚日喺世界殯儀館設靈，遺體今日喺葵涌火化場火化。噚日好多藝人都送上花牌，包括成龍、黎明、袁詠儀同陳百祥，而鄺美雲重搵咗星雲大師寫「上生佛國」嘅祭帳掛喺靈堂。譚詠麟、許鞍華同潘源良噚晚都有去致祭。譚詠麟大讚林冰嘅才華，話佢係女版黃霑，譚詠麟話：「佢好易笑，笑得好大聲，同我做訪問都唔使用筆記，喺個心入面嘅，好叻。」扶靈人士包括岳華、劉家輝、陳可辛同埋舒琪。