昨日4隻新股齊齊掛牌，但平均表現唔算理想，除咗中興通訊（763）不負眾望，收24.40元，較招股價高10.91％外，其餘中國無線（2369）同天虹紡織（2678）更以破底收場，尤其中國無線大跌20.93%，真係近期罕見咁肉酸。
經紀黃話，市況暢旺，好多人連間公司做乜都唔知就去馬，所以包銷商要圍晒啲貨一啲都唔難，但唔係隻隻股份都有炒家睇場及芬佬力撐，所以一個唔好彩隨時會中招。天虹微跌已算有交代，至於中國無線表現咁差，其實都係意料中事，所以輸咗錢唔好怪搞手冇義氣。
另外，老虎仔的遠東發展（035）收市後公布截至今年9月底止中期業績，表現超級靚仔，盈利有成2.68億元，比起去年同期急升5.3倍。
經紀黃話，一早講過遠展唔單止濠江賭業概念咁簡單，本身的地產同酒店主業亦搞得有聲有色，濠江概念只係錦上添花。遠展收2.90元，升0.9%，成交2667萬元。
慕容小初