施念慈近日激瘦十磅，日前她強調不是為離婚而消瘦，而是因續約纖體公司而成功瘦身。不過朋友均指她過瘦，故她現在拚命吃東西，希望胖一點。談到感情狀況，施念慈透露雖有裙下之臣，但一切還是隨緣。
與陳鴻業離婚的施念慈近日瘦了十磅，體重由一百零五磅急跌至九十五磅，不少人以為她受到離婚的打擊而急劇消瘦，但她日前強調自己是刻意減肥，純粹為漂亮而瘦身。
施念慈說：「人哋以為我為情消瘦，但其實我啱啱同減肥堂續咗一年約做代言人，減肥純粹為咗靚，最滿意係條腰由二十五減到二十三吋，不過啲朋友話我太瘦唔好再減，所以我最近都拚命食嘢，希望肥番少少。」
問施念慈可有男士追求？她說：「好少，不過都有男仔約吓食飯嘅，但全部都係普通朋友，我唔心急拍拖。隨緣啦，最緊要大家性格合得嚟，冇話特定有啲乜嘢要求，啱嘅時候自然會知。」
施念慈已一段時間沒有寫書，她透露明年會執筆寫小說和散文，她說：「早排寫咗本書，不過唔係太滿意，所以另外寫過本。我想出散文集，因為散文可以記錄生活嘅點滴，將來睇番好有紀念價值。」
施念慈近日還積極學日文，明年一月更會往日本探望姑姐，問她會否結識日籍男友？施念慈說：「都唔係嘅，學多種語文始終係好事，叫做學多樣嘢傍身囉。」
採訪：張止寒
攝影：林德雄
服裝提供：Ztampz
場地提供：Teca
