男子組合Boy'Z日前齊齊秘密炮製聖誕蛋糕，希望趁聖誕節慰勞唱片公司同事，兩人整餅弄得麵粉滿天飛兼一臉污糟，鬼馬的Steven更用手掌劈朱古力，又亂棍狂舞搓麵粉，最終炮製出「雙子拿破崙聖誕蛋糕」。
男子組合Boy'Z在今個聖誕節也要開工，唱片公司一班同事亦未能放假，為此日前Boy'Z專程到荔枝角一間製作甜品的私房工場炮製聖誕蛋糕，兩人騎呢整餅弄得麵粉滿天飛，變成兩隻粉面污糟貓。
當日Kenny負責在薑餅上以忌廉塗字，Steven則用棍搓麵粉團，不過他卻搓得十分肉酸，又一掌劈落裝飾用的朱古力薄片上，Kenny見他如此百厭，便把麵粉揩到Steven臉上，Steven即時還拖，結果兩人的臉及頭髮都揩滿麵粉。
雖然Boy'Z整餅看似不太認真，但仍成功炮製出自創的「雙子拿破崙聖誕蛋糕」，味道也頗不錯，事後Kenny說：「我哋有跟個師傅學整甜品㗎！我上次整甜品畀公司啲同事食，佢哋都唔信係我整，後尾佢哋見到包蛋糕啲紙係DIY，至信係我哋整咋。」
至於Steven則說：「我識煮餸，自己一個人喺屋企都有煮飯，一個人落街都唔知食乜好，不如自己整啲嘢食好過。」
此外，Boy'Z前晚在尖沙嘴一間餐廳舉行唱片慶功，英皇花了六位數字包起整家餐廳，兩位成員則扮成廚師，即場炮製梳乎厘及蛋糕，之後又合巹交杯喝紅酒，但Kenny一杯落肚已臉紅耳熱，不停儍笑。問Steven曾否製甜品冧女時？他說：「我係整過畀阿媽食咋，但佢都唔食甜品，重推開唔食㖭。」
採訪：朱倬誼
攝影：陳慧安
場地：HeartMaker
