食飯之時，碰到一位高官，好好傾。高官最近忙到一頭煙，佢話政府十多個部門齊齊為西九龍文娛藝術區努力，搏晒命。原因有兩個，其一係佢相信西九龍如果建設成功，可以留下文化遺產畀香港下一代；其二係呢個機會千載難逢，如果明年爭取唔到興建西九龍文娛藝術區，呢幅巨型臨海地皮一定會有排曬太陽，曬曬吓就會有地產商畀壓力要求勾地，最終結果就係成個西九龍都變成豪宅，或者係七十年代開發尖東嘅翻版。政府賣西九地可以收番好多錢（未知有幾多，大家可以任估，譬如領匯估值三百億，議員話值一千億），但呢啲錢全部入晒庫房，未必可以撥歸文化用途。
左丁山旗幟鮮明，贊成（一）把握機會建設西九文娛藝術區；（二）贊成單一招標，分拆一定衰收尾；（三）認為有咗西九龍文娛藝術區之後，會產生示範效應，在某一程度上如Say'sLaw所謂：Supplycreatesitsowndemand，何況香港係一個高度缺乏藝團演出場地嘅地方？
高官聽到Say'sLaw，若有所悟，佢記得麥理浩做總督之時，有一位西人興致勃勃咁求見十五分鐘，拿住一張草圖，話馬會在沙田興建新馬場，捐款興建銀禧體育中心，亦會捐助藝術建設，在藝術中心旁成立一間演藝學院。麥理浩笑咪咪咁回應：「Itisajollygoodidea!」於是以後灣仔就有咗一間APA（演藝學院），當時冇所謂文化政策、業界諮詢。有咗APA，今日香港演藝界先至叫做有啲人才。時代唔同咯，今日話要建設西九，咁多文化人話Itisabadidea，政府點敢拍板。