石修早在七十年代開始唱電視劇主題曲，五年前更自學吹色士風，最近他便與三個和他兒子年紀相若的年輕人組成樂隊，打算在聖誕期間到大學校園作公開演出，活力無比的他實在是娛樂圈中的長青樹。
石修最近與三位年輕人以業餘性質組成樂隊，他負責吹奏色士風兼唱主音，在聖誕檔期獲邀到浸會大學及中文大學作公開表演，過一個活力聖誕。
修哥在七十年代唱過不少電視劇集主題曲，包括《心有千千結》、《民間傳奇》、《猛龍特警隊》及《彩虹化身俠》等，更會彈結他及吹色士風，其對音樂熱愛的程度絕不遜於一些全職歌手。
修哥玩樂器全是無師自通，他說：「我喺嗰個年代想追女仔，識彈結他同唱歐西流行曲着數好多！至於玩色士風只不過係五年前嘅事，有一日喺屋企拎起個仔小學玩過嘅色士風試吓玩，點知又玩到喎，之後咪自己買書睇，𠵱家已經超越晒個仔。」
修哥表示組樂隊並非為賺錢，而是享受觀眾帶來的直接反應，他說：「我哋出show都有酬勞㗎，但我哋四個都唔計較有幾多錢。女隊員Phoebe嘅正職係核數師，彈鋼琴彈到演奏級，𠵱家負責打鼓。Phoebus係香港電台第四台嘅節目主持，負責彈鋼琴。至於阿邦係做賣酒生意，業餘都幫過唔少歌手做幕後工作，𠵱家負責base部份，佢嘅音樂造詣都好高㗎。」
採訪、攝影：卓美娟
