對於香港法律改革委員會向政府建議，立例管制傳媒報道公眾人物私隱一事，不少藝人對此都十分關心，大部份都保持中立，認為新例打爛狗仔隊飯碗並非好事。
房祖名 ：我保持中立，政治嘅嘢我唔叻，我本身鍾意影相，唔畀狗仔隊影相好似好霸道，要再睇。藝人同狗仔隊要互相尊重，狗仔隊都有專業、有文化嘅人，亦都有壞人，正如太極陰陽，唔可以一竹篙打晒一船人。
黃秋生 ：我哋俾人侵犯咗咁耐，早就應該咁做啦！嗰啲八婆雜誌留返畀八婆睇啦，我同邊個行街食飯，唔係我嘅工作。咁影人裙底又係自由囉喎？係咪有知情權，有冇影響新聞自由就好難講嘅，有待商榷，最緊要兩邊傾清楚囉！
劉浩龍 ：唔敢講呀，我都冇知識，其實唔影響都冇所謂，做藝人一定會俾人影，大家都要食飯，唔可以整爛人哋飯碗，我有飯食，人哋又有飯食就得，都係中立。
薛凱琪 ：冇狗仔隊可以舒服好多，多咗好多空間畀自己，但狗仔隊會好慘，冇咗份工。其實狗仔隊唔過火就得啦，有次我喺街上俾人影，嗰個狗仔就好好，佢知我行街買嘢，重幫我拎住買咗嘅嘢，重幫我截埋的士，所以我都係保持中立。
