著名歌劇《歌聲魅影》自從一九八六年喺英國倫敦公演以來，一直大受歡迎，至今世界各地已經有超過八千萬觀眾睇過呢套劇，最近《歌聲魅影》拍成電影版，當然備受各界注目啦，有影評人重話呢套新片以及當中扮演毀容音樂天才嘅男主角謝拉畢拿（GerardButler）、女主角艾美羅森（EmmyRossum）同導演祖舒密查（JoelSchumacher）好有機會提名下年奧斯卡最佳電影、最佳男、女主角以及最佳導演幾個大獎㖭。
唔少人認為祖舒密查過往甚少拍過出色嘅作品，照計未必能夠完全拍出《歌聲魅影》原著嘅神髓，不過據聞創作原裝舞台劇版嘅音樂大師安德魯萊韋伯（AndrewLloydWebber）十幾年前就認定祖舒密查係拍《歌聲魅影》電影版嘅最佳人選，而今次韋伯重親自出任監製㖭，相信應該唔會令觀眾失望。
今次電影版以歌劇形式表達，戲入面嘅演員要由頭唱到尾，佢哋嘅唱功差啲都唔得，好似得十八歲嘅女主角艾美就係一位如假包換嘅唱歌高手，佢七歲開始接受歌劇訓練，曾經演出超過二十套歌劇，相反有份演出嘅美妮哉花（MinnieDriver）就失威啲，雖然佢啱啱先出過唱片，但係喺戲入面嘅歌都係由歌唱老師代唱，難怪前日呢套新片喺德國舉行首映禮嗰陣，美妮哉花特別着得性感啲，等其他人唔好睇小佢！