過去兩日，恒指成份股市值蒸發706億元，紅籌指數成份股冇咗221億元，國指成份股唔見79億元，重有其他股仔縮水好多個億。領匯（2382）上市，兩個老人家遲唔遲早唔早入稟申請司法覆核阻止領匯上市，市場氣氛受到影響，有股在手者多得佢哋唔少。兩人1個67歲，1個77歲，如果真係咁有魄力，後生之時早已經……。香港，愈來愈多攪×（中文字9劃）棍。
恒指C輪4478：博領匯下周四如期上市，或者博個市低跌後反彈，搵恒指C輪炒吓。恒指C輪以往主角係9911、4442、4444，但𠵱家已經靜晒，炒家火力集中喺4478、4552與3540。3隻輪中，4478成交最大，壽命稍短，槓桿率稍遜，但溢價着數番晒。隻輪明年3月底到期，輪價20.6仙，畀2%溢價去賭，唔貴。好市之時，1日之間恒指都可以升2%。貨比3家冇蝕底，結合各種數據，炒恒指C輪，首選係4478。
滙控C輪4441：前日講過，中高度搏殺嘅滙控C輪，係4550。計數安安樂樂揸耐啲，唔使點蝕溢價嘅，則始終係4441。4441輪價98仙，溢價0.9%，槓桿率13.5倍（有效9.2倍），引伸波幅16.3%，有大半年命，正股（005）半年內只要升10%，隻輪見2.2元。
章盛