《歡樂滿東華2004》高難度表演一年比一年少，今年大部份表演項目均是歌手載歌載舞，容祖兒（Joey）跳中國舞，黃伊汶則踩滾軸溜冰，施展一字馬鑽過車底，技巧更勝Joey。
黃伊汶和容祖兒昨日在將軍澳電視廣播城綵排《歡樂滿東華2004》表演項目。黃伊汶表演「滾軸『伊』人展英姿」項目，她要踩滾軸溜冰，以一字馬鑽過一架大貨車底。
黃伊汶說：「好緊張，其實十幾年前踩過roller到𠵱家，早三個星期開始練番，我重請個教練教我，所以成日要喺屋企紮馬，因為我瘦，個pat又尖，成日插落個地，所以patpat最傷，成個瘀晒，好似俾老公虐待咁！」
一身仙女打扮的祖兒則表演「敦煌飛仙樂『容』融」，大跳中國舞，穿上性感舞衣的Joey露出滑溜肚皮，性感誘人，更拿着琵琶手舞足蹈，難度比黃伊汶的鑽車底表演項目低得多。
對於這個仙女look，Joey滿意地說：「今次個look都幾得意，不過跳舞時就要縮肚，咁樣會靚啲，平時着露臍裝會唔食嘢，但今次唔可以唔食，因為我怕冇力跳，又要成日舉起個琵琶。噚日綵排咗成日，成個人跳到散晒。」
Joey表示跳舞項目可能會錄影，她說：「我都想錄影，咁會執得靚啲，因為我冇中國舞底子，同埋聽日我就要去大馬出席頒獎禮，我驚去完頒獎禮唔記得晒隻舞點跳。」Joey笑言會帶備護身符出席頒獎禮，她說：「大馬好『猛』，所以我會帶定畢身所有嘅護身符。」
另外，《東華》又邀請了電影《功夫》演員元華、元秋、田啟文（田雞）、陳國坤（小龍）和六師弟林子聰等表演「功夫奇兵出善招」，眾人即席表演用肚皮吸着湯碗，及用手掌碎合桃等。
採訪、攝影：楊潔雯
