李彩樺（Rain）現身在內地拍劇，今年聖誕將會在內地度過。由於收工時間相當無聊，百厭的阿Rain便想出自製緋聞來整蠱內地同胞，四圍發放她與劉德華拍拖的消息。
李彩樺與寰宇簽約後，工作接踵而來，最近她與羅嘉良到橫店拍攝重頭劇《昭君出塞》外，農曆新年後亦接拍了由彭順與彭發導演、於泰國取景的新片《鬼域》。
現身在橫店拍攝《昭》劇的阿Rain，今年聖誕將在內地度過，她說：「我今年唔喺香港，唔會好似往年咁，開party、交換禮物，都冇辦法啦！」問她會否悉心選購聖誕禮物給緋聞男友蕭定一時，她笑說：「大家只係朋友，況且我今年唔喺香港，唔會特別送禮物同慶祝。」
由於在內地拍劇的空閒時間相當無聊，所以阿Rain便想出自製緋聞來整蠱內地同胞，她笑說：「我喺內地都有好多fans認得我，有時見到啲遊客，啲工作人員就會假扮遊客，周圍同人講話我同劉德華拍拖，又話我同郭富城跳舞，而佢哋就真係以為真，跟住又周圍同人講，真係好搞笑！」
阿Rain首次與羅嘉良合作，劇中更有親熱鏡頭，二人能否擦出新火花？阿Rain說：「梗係有啦！我今次真係學到好多嘢，佢好肯教人，開始拍嘅時候有啲唔慣，有啲地方唔係咁好，佢會話畀你聽，而佢嘅經驗豐富，佢會教我用心去做。而我最難忘嘅就係第一次講國語對白，自己第一次聽番真係覺得好好笑，但係好彩佢哋冇笑我，之後我就不斷練習講國語，𠵱家已經習慣。」
採訪：羅慧敏
攝影：陳偉權
服裝提供：MissSixty
髮型：WillieLeung（QSalonQuadruple）
化妝：QuixB@headquarters
