恒指散213點，除咗國壽C輪之外，幾乎所有C輪都四腳朝天。有人歸咎個市跌係因為啲政治噪音。恒指收14022，而期指則保唔住萬四點，但相差只係19點。期指低水41點，冇乜微言大義，試過好多次，期指低水之後跟住個市就上升，同市場智慧開玩笑。
新地C輪2252：新地（016）收76.50元，跌1.75元，與上周最高位80.75元，相距拉闊到4.25元，好快會有實力客趁低接貨，發吓聖誕財。
低位買新地C輪博反彈，諗得過，主角係2252。隻輪跟正股跌11仙，收54仙，一跌就係1/6，啱兜貨。隻輪明年2月夠鐘，溢價3.8%，槓桿率14.2倍（有效8.9倍），引伸波幅30%。大市喺高位反覆，炒輪策略係做trading，例如5毫邊邊上車，6毫以上落車，密食當三番，做得好嘅話，係爆棚而唔係三番。
長實C輪4460：長實（001）同新地難兄難弟，跌2.25元，價位跌幅大過新地0.50元，又有機會反彈，上升軌冇咁易受到破壞。
長實C輪炒家，已將火力集中喺4460身上。舊愛2249與2258（數據好靚）貨源愈來愈疏，交投大減。4460成為新歡，單日成交金額接近9千萬，收48仙，散10仙，又係唔見1/6，明年3月到期，溢價4.8%，槓桿率15.3倍（有效8.9倍），引伸波幅28.2%。
短線炒上落，唔使過份計較溢價，炒佢係博正股上番，帶動輪價。做trading，50仙以下買入，60仙以上散水，做得幾轉，又係當食三番甚至爆棚。
章盛