金庸俾大陸文人告 - 李八方

  金庸俾大陸文人告 - 李八方

武俠小說大師金庸近年興致勃勃改寫作品,但卻被發現愈改愈錯,不過唔係情節犯駁或史實有誤,而係內地常州有位專捉人錯字嘅仁兄李延良,擅自同大師改稿,改完發覺冇錢收,更為此「狀告」金庸,要索取「校對費」。
事緣李延良於九八年已向金庸提出《射鵰英雄傳》有二百幾處出現錯別字同「語法錯誤」,呢位大陸佬以為執到寶,打電話畀金庸指正,金庸好大方咁話多謝賜教,重講笑話會請李延良做校對。
李延良一聽大喜,信以為真,拿拿林就校對金庸其他作品,結果俾佢搵到有一千二百幾處「錯誤」,出錯程度超過「國家規定」萬中無一標準,佢去信金庸提醒大俠守諾請佢做校對,點知大俠於○○年回覆稱當日純屬戲言,自己作品一向交由明河社出版同校對,唔使勞煩李生。
李延良大怒,即時就走去常州市中級人民法院提出控告金庸,並攻擊金庸容許作品錯別字連篇,係漠視讀者同中國文字咁話喎!其實呢位李生早有前科,九六年起已指正多位名作家作品錯字多告上法庭,當然冇一單案勝訴啦,佢好老實咁講,此舉無非想向金庸攞多少錢咁啫。


傳真︰2623-9278
電郵︰[email protected]