乘小巴，圍繞我的兩男一女在聊天。坐前面的兩個男生拿着相簿在看，相中有人身披黑袍、頭頂四方帽。
「呢條女真係幾索。」左邊的男生看着照片說。「知唔知佢叫咩名？」右邊的男生回頭問。「睇過！」坐在我旁邊的女生俯前看，「Kitty吖嘛，Samuel咪係佢條仔囉。」男生問：「邊個Samuel呀？」女生指着照片說：「戴四方帽呢個呀，系會個副主席呀，響O'Camp已經媾咗佢啦。」男生顯得激動，「呢條粉腸?!佢執到啦！」女生同樣語帶不屑，「有幾執到呀？Kitty好粗口喎。」男生不以為然，「咁又點呀？個樣生得靚，粗口啲可以接受吖。」另一男生附和，「係囉，不過你就真係抆水啲喇。」兩人相視而笑，女生罵道：「×你！」
女生留一頭長直髮，看上去挺端莊，她續說：「嗰日同朋友傾開，話如果我哋響year1都冇拖拍，去到year2都好×抆水。Year1係金、year2係銀，去到year3就變爛銅。」男生豎起食指更正：「欸！我哋男仔唔同喎！Year1係銅、year2係銀、year3係金喎，因為到咗year3，year3嘅女仔我哋可以媾，year1嘅一樣可以，哈哈！」女生歪着嘴巴說：「×××，真係唔公平！」
在讀大學時，我沒想過這相對性的問題，說來的確如此，莫怪乎我在year3豔遇特別多，嘿嘿。在年齡上，女性總是給男性佔了便宜，女性的戀愛期限一般比男性短。「既然知道時間寶貴，咁你就唔好講咁多粗口啦！」我忍不住對女生說，接着，諸事八卦的我聽到了多聲道的粗言。