呢排假波傳言滿天飛，歐洲足協都特別喺周二晚展開嘅最後一輪歐冠盃分組賽前，高調要求各支已出線或出局，只係進行「例行公事」嘅球隊咪揸流攤。唔知車路士同AC米蘭係咪真係避嫌，齊齊強陣出擊，結果大家都冇得贏，難為睇埋陣容至落注嘅波友，以為佢哋照去馬而捧場，以致損手而回。
其實又唔係隊隊都重同你打真軍喎！另一邊廂，巴塞隆拿咪只係搵佩奧爾同沙維兩位大哥，帶住成班後備嚟同主隊薩克達踢！結果主隊好順利咁贏二比○，呢啲波就應該幫到各位手嘞！
我求大俠唔係想見到多啲「假波」幫波友贏錢，只係覺得好似巴塞咁，出咗線畀班主力休息吓係好正常，都唔可以話佢哋有心放水嘅，唔通係要打到舒夫真高同林柏特呢啲主力球員傷晒至啱咩！
彭尼奧尼奧斯上星期對第比利斯戴拿模嘅「假波疑雲」震驚歐洲球壇。傳聞有位住喺澳洲嘅格魯吉亞球迷，一早喺一個足球網站留言板，發放半全場賽果，因而引發瘋狂落注。佢事後又透露，曾接獲同多間球會有聯繫嘅奧地利朋友來電，告知比賽會打成五比二，呢次事件肯定有排查。
巴塞隆拿後衞艾美臣可能見自己喺季前加盟球隊後，上陣過冇幾多場就因傷長唞，驚啲球迷唔記得佢；日前佢就開腔表示，目前嘅巴塞贏晒死對頭皇家馬德里，狂踩皇馬取悅巴塞球迷。其實咁做都無可厚非，但係皇馬都有朗拿度同卡路士等國家隊嘅老友，一陣傷埋感情就唔好啦！
卡利亞里老將蘇拿近況大勇，周日聯賽對基爾禾就省入兩粒。意大利國家隊教練納比前日就話任何有實力同熱誠嘅球員都有機會奉召入伍，年齡並唔係問題，暗示蘇拿有機會再踢國際賽。假如呢位三十八歲老將真係獲重召，都咪話唔驚人，但諗深一層，佢嘅表現確好過唔少後輩。
有睇過曼聯上場對修咸頓嘅波迷，都應該認同基斯坦奴係就係扭得，但射術認真麻麻，不過佢最為人詬病嘅並唔係呢樣，而係成日被對手鬧「插水」。連領隊費格遜都同意呢個後生仔被侵犯時往往反應過大，但補充話佢已經改緊呢個陋習。連爵爺都咁講，基斯坦奴要生性啦！
逢周一至周五見報