反對西九龍嘅文章，我哋睇得多，絕大多數係文化界人士執筆，而呢啲文化界人士有一個特點，就係以評論員為主，甚少係真正文化藝術工作者，靠文娛藝術吃飯之人。呢批文化人陳義甚高，似不吃人間煙火，但佢哋能言善道，文筆犀利，政府冇法子找到同樣人物「助拳」，所以曾政務司長蔭權同一批高官輪流赤膊上陣，親自執筆，為西九辯護，都算辛苦咯。
真正靠文娛藝術吃飯之人就有唔同睇法。曾司長文章見諸各報之日（十二月六日），著名男高音莫華倫就喺《南華早報》大吐苦水，指香港缺乏歌劇演出場地，文化中心音樂廳嘅音響九流，係全世界最差劣嘅一個地方，文化中心大劇院嘅音響效果稍為好啲，而兩個場都好難預訂，最早都係早到一年前，但大型歌劇要早兩年就籌備，所以香港藝團好難有充份時間準備好演出一套歌劇。佢即將製作《LaTraviata》，只得四日時間布置文化中心劇院舞台。在其他城市，一套歌劇嘅製作布景需時七日，再排練七日，先至正式上演。香港喇喎，有四日畀你布景，算你夠運。
莫華倫話香港極度需要西九龍文娛藝術區，愈快有愈好。地產商既然有錢、有資源，又肯上馬，咪等佢哋投資興建囉！此言未嘗無理，香港缺乏有水準嘅演出場地，所有製作人、藝人，以至公眾，都蒙受損失。正如曾蔭權指出，假如政府將西九龍土地逐幅拍賣，省時省事，但賣地所得，有幾百種用途，好難畀文娛藝術有優先。香港文化界既然咁多反對聲音，重有乜好理由要公帑津貼佢哋，不如將啲錢去搞好教育先，撥多啲錢畀大學搞國際文化與三三四學制啦。