美元升番多少，大市噚日就即刻急跌2百幾點，加上絕大部份資金流向新股，所以好多股仔都回得好急，部份原本開車無耐，但都急急回軟。
變靚D控股（8079）連升多日後，昨日回落7.4％至5仙，成交股數6724萬股，金額346萬元。經紀陳話，隻股開車無耐，照計唔會咁短癮，如果市況好轉或會再嚟過，市傳隻股打算炒高後抽水。
經紀陳話，自從才子接手變靚D後，公司銳意發展纖體生意，甚至赤膊上陣做埋生招牌，但直至最近先至有多少鑊氣。
雖然變靚D街貨唔多，但久唔久都有沽壓出現，皆因變靚D變身之前，有其他主要股東揸住唔少貨，但相信問題唔係咁大。
另外，北泰創業（2339）早排斥資1.82億元收購汽車零部件生意，雖然獲得唔少分析員睇好，但股價就未見受惠。
經紀黃解釋，北泰上市以來，有個大芬一直坐住唔少貨，久唔久就在市場上減持，所以班分析員唱極都唔起。
慕容小初