許愿前晚去咗西灣河香港電影資料館電影院出席電影《我要孭飛》首映禮，佢話自己減肥減得好辛苦，成日要忍口唔食嘢，前日天氣太凍，佢忍唔住食咗碗上海麵，佢又突然問記者：「我今日冇化妝，唔知係咪樣衰衰呢？」即刻搞到現場班記者你眼望我眼，惟有答佢話唔係算嘞。
許愿話已經由一百八十磅減到一百四十三磅，而佢嘅目標係減到一百三十八磅，佢話：「我用咗幾個月時間減咗四十幾磅，真係考功夫㗎！」
講到前妻李麗珍去台灣出席金馬獎時，馬太李靜婷突然間攞住本《珍人真事》走出嚟嚇珍妹件事，許愿話珍妹前日同佢通過電，佢叫珍妹同個女出入時小心啲。問許愿有冇安慰阿珍，佢話阿珍大把朋友陪佢同安慰佢喎。
之後許愿又話唔想講太多馬太：「都唔知佢係宣傳定係乜，成件事驚驚地，都唔似係正常人會做嘅嘢，如果佢再騷擾人，唔排除會報警㗎，希望佢唔好搞到屋企人，唔好傷害到小朋友啦。」
上個月尾返回河北跳水隊嘅郭晶晶，日前又去咗北京，不過今次就唔係出席商業活動，而係去同仁醫院睇眼。原來晶晶喺○一年被驗出右眼視網膜出現裂孔，做咗手術後又再發現左眼患上先天視網膜變異。晶晶對眼無論喺體育生涯，抑或喺娛樂生涯對佢嘅影響都好大，好彩今次冇事，晶晶終於可以鬆一口氣！
官恩娜噚日化身成天使去中環出席一個慈善活動，重獲得謝瑞麟贊助八萬元鑽飾。問佢平時有冇買吓珠寶，佢即刻笑話：「我好窮㗎，朱義盛就有好多，𠵱家重爭公司錢，加上係新人又唔係搵好多，平時自己都好慳，因為經濟狀況唔係咁好，所以冇助養小朋友，不過遲吓等經濟好啲都會去助養嘅。」
台灣歌手游鴻明多年來擅長演繹傷感情歌，佢嘅作品有《下沙》、《愛我的人和我愛的人》同《孟婆湯》等，不過可能唱咗十一年呢類型嘅悲情歌，佢最近決定改變歌路，重演繹咗首搖滾味道嘅歌曲《戀人的直覺》。佢噚日喺上海宣傳時話：「大家都習慣了我的風格，遭到非議也在情理之中。」
陳鍵鋒噚日喺將軍澳電視廣播城宣布獲紅十字會委任為「紅十字青少年大使」，中學時代已經係會員嘅佢話事隔七年再着番紅十字會嘅制服，感覺好唔同，佢話：「今次係連升好多級，成為高級職員，𠵱家多咗三條柴，嗰日出席活動時重有會員同我敬禮㖭！」
𠵱家重拍緊嘅電影《驚天傳奇》，繼成龍和譚耀文先後墮馬後，噚日又發生咗意外。話說大隊拍攝一個萬馬奔騰嘅場面，其中一匹馬突然發狂，後退跳吓跳吓，然後墮地，結果壓到一位機組人員，搞到佢左腳骨折，導演唐季禮即時替傷者急救再送去醫院，幸好已無大礙。
