日本女星井上和香憑住豐滿嘅身材以及性感嘅雙唇成功上位，成為日本新一代性感女神，拍劇同拍廣告之餘，重幫唔少綜藝節目擔任主持㖭。但係早前就有日本雜誌報道，話井上有意仿效優香同酒井若菜咁嚟個「水着封印」，搞到唔少日本男fans鬼咁擔心，有如面臨世界末日。
不過，井上對呢啲傳聞一於好少理，即將喺今個月二十一日推出全新DVD《和香日和》嘅井上，最近就為日本雜誌《FRIDAY》拍咗一輯全新性感寫真，以實際行動向fans派定心丸。
井上喺上一本寫真集《WAKAKORE》中大玩COSPLAY，今次實行繼續以制服誘惑fans。原本着住一套密實OL裝唔多顯眼嘅井上，竟然唔聲唔聲變身做比堅尼女郎，喺辦公室大騷誘人身材，即時令工作環境嘅氣溫上升。然後佢又換上藍色泳衣，變身賽車女郎，轉頭又紮起辮仔大sell天真可愛，認真百變。
而為咗宣傳全新DVD，井上將會喺今個月二十五號舉行握手會，同fans共度一個熱辣辣嘅聖誕節。