教育統籌局局長李國章無論出席乜嘢場合，都經常俾記者問長問短。噚日太子出席賽馬會資助一百七十個高中生上京修讀所謂「國情教育」課程嘅場合，影完大合照，記者準備上前「扑咪」，點知阿瑟王立即走位，拉咗兩個女學生去記者咪高峯前面，重笑笑口咁話，「唔好成日捉住我嚟問先得㗎!」隨即由局長變身記者，喺鏡頭面前問兩個女學生今次上大陸有乜期望。
李局長同兩位同學真情對話咗幾分鐘，再簡單回應記者嘅問題。隨即轉過頭，細細聲同兩個同學講：「真係多謝你哋救咗我。」點知好衰唔衰，俾旁邊嘅記者聽到。兩個被局長「利用」都唔知嘅女同學，被記者追問點解俾局長擺上枱，佢哋先至話事情好「突然」。
（圖）李國章無啦啦拉埋兩個女學生嚟陪佢面對記者，好彩冇嚇親人咋。
謝榮耀攝
傳真︰2623-9278
電郵︰