今個月適逢聖誕節，新地鴨脷洲深灣軒，揀咗啲有份量嘅禮物回饋買家。即日起至今個月二十七號，送三房單位買家BenzE-class一部，價值五十萬。
新地代理總經理周國賢話，𠵱家重剩番三十個三房單位。如果喺優惠期內賣晒，將來呢批住戶入伙之後，相信停車場撞口撞面都係同款車，如果三十架車泊埋一齊，唔知會唔會上錯車呢？
餘下嘅八十個細單位，就送買家兩卡鑽石，都值二十萬，如果今次可以清晒貨尾，新地就總共送出價值三百一十萬嘅禮物。呢批單位最平賣三百一十幾萬，而三房平均七百萬。
至於新地明年大計，周國賢就話，將會有六個新盤登場，分別係上水皇府山、將軍澳中心十三座、尖沙嘴凱旋門、大角嘴嘉雲西岸、馬灣珀麗灣五期同埋元朗YOHOTown二期。有機會成為頭炮嘅皇府山，會提供特色單位，意向呎價同信和御林皇府一樣，又係一萬蚊，其中相連單位，由逾千方呎至三千方呎。
薄扶林貝沙灣頻攞獎，遠至法國嘅報紙，都要頒個獎畀佢。法報LaTribune，喺香港芸芸眾物業中，選佢做最具代表性豪宅，又訪問盈大李智康，講述發展心得。
同由盈大負責嘅數碼港商場TheArcade，又獲RetailWeek及RetailWorld首辦嘅設計大獎，表揚創意設計、具啟發性。呢個國際大獎，喺上個月十八號，法國康城MAPIC2004活動中頒授。
盈大顏金施話，個場二十九萬呎，為港島南消閒購物中心，集媒體科技、零售、娛樂、飲食及展覽元素。內有五十四店舖，另全天候廣場，供多用途表演。
永泰與南豐火炭晉名峰，開放示範單位以嚟，過去三個禮拜，賣出百五伙，算係近期銷售較佳新盤。
永泰亞洲李簡鳳玲話（圖四），項目暢銷，反映市場對中大型單位需求大，換樓意欲高，推動銷情。
賣出單位中，十八套為相連戶，即涉及三十六伙，成交價一律過千萬，投資者佔三成。現時促銷中嘅C及D座，餘下四十多伙，呎價六千至八千，市傳個盤今日加價。
市場人士傳出，樓市大好友、瑞銀投資香港證券投資主管林奮強，剛剛斥資近二千萬，買入大坑帝后臺兩個貨尾單位，各一千四百一十八呎，平均呎價約六千八。
帝后臺今個月初推出以來，竟然十分搶手，唔夠十日，就賣清全部十二個貨尾，令唔少地產代理大跌眼鏡。
相信因為臨近年底，發展商普遍唔願拎啲新樓嚟賣，裕泰興就趁呢個空檔，推出丟空咗幾年嘅帝后臺餘貨。
呢批貨，一時之間十分搶手，更出現幾單大手成交，除咗林奮強外，重包括一名本地投資者，一掃五伙，總值五千萬。
中記話，投資者尹柏權，上月以兩億幾，購入深水埗地鐵站出口龍朝酒樓，幾個月後至完成交易，計劃下周分拆五百間細舖摸售，呎價兩萬。
個場三萬幾呎，可賣七億幾，淨袋四五億。
一至三樓會變身電腦與時裝主題商場，改名深之都。
不過，蘭西一直未睇到土地註冊處有呢單交易，連代理拆售嘅中記，都話唔知成交價，因為唔係經佢地買入，買家若有疑問，最好搵律師。
繼按揭證券公司接受再融資按保、滙豐推出加按轉按後，經絡集團不甘後人，夥拍銀行，安排「轉按靈活錢」按揭計劃，業主轉按，可享高至一點五巴仙現金回贈，按揭成數最高八成半，還款期最長二十五年，全期息率低至P減二厘八。
為咗再加強吸引力，經絡集團副行政總裁盧子勇話，凡喺下月底前，透過經絡申請，明年六月底前，成功提取貸款，就可以獲贈高達一千蚊嘅百佳現金禮券。
電郵地址：
