紅灣醜聞縱深時空發展，扯埋二十年前嘅愉景灣補地價問題！原來愉景灣初初發展嘅目標，係度假酒店，點知一個偷龍轉鳳，變咗做地產，當時嘅殖民地政府公然放水，毋須佢補地價！
二十年前血淚一幕，未來十年，隨時會在特區重演！愉景灣本來講好係做酒店，咁都可以變身做地產，咁西九龍文娛藝術中心，同埋大嶼山發展大計，一個話做博物館、歌劇院，一個話做主題公園水療度假村，將來咪又係一樣，落咗搭，隨時變咗做地產？
使唔使補地價？睇吓紅灣半島就知嘞！𠵱家紅灣就拆樓重建，佢話冇轉變到土地用途，以前係住宅，以後係豪宅，一樣有個「宅」字，一個仙都唔補，咁你鬍鬚孫又吹得脹咩？有種嘅咪對簿上訴庭囉！
將來「開發」大嶼山，一樣可以有得走位。例如將啲水療村、主題公園、賭場，同豪宅相給合，起晒啲多層豪宅大廈，不過一樓平台，就係一個主題公園，有侏羅紀恐龍模型，又有過山車同摩天輪。二樓，就係一個超豪嘅水療村，而三樓就係casino，佔地面積，大到無倫，不過四樓打上，至八十九樓，就全部係豪宅單位！地產商咁樣入標，可以名正言順，一個仙地價都毋須補喎！
有濟民查公開咗個頭，有咩嘢話唔得？鬍鬚孫回答立法會帳目委員會質詢，好負氣咁話：唔通將愉景灣住宅炸咗佢咩？
冇錯嘞，即是好似當年係有人入錯洞房，仔都生埋，又有高官湊住呢個吖吔乖仔，湊足二十年，有晒感情，唔通𠵱家驗DNA知道係當年搞錯，就親手將個仔「鍊」瓜咩？
唔得㗎嘛係咪？所以孫明揚真係有人情味。有啲嘢，大錯早已鑄成，係冇得返轉頭，就算長江三峽水壩起錯咗，都冇得炸番平！呢啲就即是大陸佬話齋，叫做「交學費」嘞！
不過，對於一個資質愚蠢嘅學生來講，交學費，係永遠都交唔完嘅！特區儲備重有三千幾億，孫公交完，重有其他高官排隊等住交，交足五十年，睇怕交到二○四六年都未曾升到讀小學喎！
傳真︰2623-9278
電郵︰