港股噚日大跌逾200點，形勢逆轉，短期仍有下跌風險。
國航（753）已截止認購，領匯（2382）今日最後，但有消息話高院會就申請禁制令展開聆訊，構成不明朗因素，亦令到地產股遭受好大嘅拋售壓力，加上大戶近日係好着意咁㩒低個市，好似唱淡隻中移動（941）就幾齊心合力，結果大市終掉頭向下，期指萬四關不保，低收13981，跌279點。
大市走勢轉壞，係中期升勢見頂，抑或大戶震倉，兩樣都有可能。若屬前者，則後市每有反彈，都係沽貨機會；若係後者，則震完倉之後，大市可能重會升多轉。噚日午後大跌之勢突如其來，既急且狠，好倉被殺個措手不及，若真係大戶震倉，即係後市重起碼會有一段較長時間的上升，而且升幅亦會比預期為大。
高盛就看好港股，將評級調升到「增持」，預期恒指明年有機會上升到16000，並看好銀行、綜合、零售同地產類股份。
噚日上升股（不計認股證）重有過百隻，本欄一直看好嘅銀建（171）同中信21世紀（241）榜上有名，前者升3格，後者升1個位。銀建同21世紀都好事近，聽聞呢個月會有料到，銀建有機會見5字頭，21世紀先坐三、後望四。
呢輪推介咗兩隻工業股，佑威（627）同德信科技（1228），噚日雖跟市下跌，但只微跌1個位，已算好硬淨。今次推介滙多利（607），重更強勢，收1.12元，升1個位，此股喺周一大升後，在高位完全冇壓力，重升多兩日，而成交亦創出自去年12月以來嘅高紀錄，相信在1.10元水平略作整固後，可向1.30元的上升目標推進。
滙多利主要從事設計同產銷電器，過去4個年度，營業額和盈利，都有穩定增長。上年度（04年4月年結），營業額2.9億元，升23.4%，獲利6788萬元，升20.3%，每股盈利17.2仙，全年派息5.2仙。05年度首季（至今年7月止），營業額5991萬元，升20%，獲利1437萬元，升14.9%，主要係風扇及暖爐的銷售額大幅增加，以及致力開發歐洲及美國市場所帶動。
去年底，滙多利大股東曾應基金要求讓股，聽聞近日又有基金敲門，而且胃納頗大，唔排除佢哋會在市場收集，近日股價有異動，可能與此有關。
郭兆誠