人人申請國航（753）、領匯（2382），市場資金大為緊張，股市就在高位繼續牛皮，成交亦只造到近期相對較低的174億元。恒指收市14235，跌21點；期指則較強，收14260，高水25點。
睇大戶手影，有迹象顯示，佢哋唔想個市起住。除咗長實（001）同和黃（013）勒唔住之外，其他兩隻大藍籌，都似有無形之手㩒住。長和系逆市而升，特別係和黃，買盤之強，好耐都未見過；結果掃到上71.50元高收，大升1.75元，升幅2.5%，和黃C輪更升到七彩，睇勢重有得去。一波啱啱先調高和黃嘅目標價至82元，評級優於大市。
滙控（005）同中移動（941）被㩒到實一實，滙控跌1個位，中移動則跌0.25元。只要大戶認為時機成熟，一鬆手，呢兩隻大藍籌就再搶韁而上，滙控只要衝破135元阻力，量度上升目標指向145元；中移動家吓調整緊，形成旗形，若再破位而上，有力向29元水平推進。
新地（016）早幾日上過80.75元之後跟市調整，噚日收78.25元，屹立不倒，調整似已完成，若升破79元阻力，以由今年2月開始形成的大型頭肩底來衡量，上升目標去到93元。
新地值唔值93元呢個價，冇話唔值，事實上，好多大行都睇好新地，目標價亦係去到90元水平。就以瑞銀為例，佢哋預測新地每股資產淨值係89.40元，目標價係98元。大華繼顯則較保守，佢哋估新地每股資產淨值80.50元，目標價係88.60元，就算以此價評，現水平入市，仍有13%上升空間。
大摩亦指出，在樓宇供應緊絀及資金持續流入股市的情況下，地產股在未來一至兩年仍會處於復甦階段，該行建議可繼續收集地產股。另外，穆迪亦調高新地的評級，主要係新地受惠地產市道上升，現時土儲足夠未來4年發展，再加上擁有逾2100萬方呎農地，大部份都在現行或計劃興建的鐵路沿線，令新地在補充土儲上更為靈活。
看好新地，其C輪2252最抵買，明年2月到期，溢價2.9%，槓桿率12倍，噚日收0.65元，已行先一步，升穿旗形阻力，照度上去，短線可見0.90元。
郭兆誠