唔怕洩露年齡，亦唔怕賣花讚花香，還記得二十幾年前電子遊戲仍是「珍品」的日子，兩塊紙皮幾粒波子一盒橡筋，已可於一個下午「玩殘」十幾廿個小朋友，而且日日新款創意無限。
本周日中環遮打道會變身遊戲街，將好多接近失傳的小遊戲掘番出嚟，阿婆一張報紙幾條竹枝，就變個「紙炮」，紮支橡筋槍，挾持你穿越時空隧道回到爸爸爺爺童年時。
記者：陳慧敏 攝影：伍慶泉
Models：Queeny、Kendy（StarAsia）
今次「飛越無限遊戲街2004」以「遊戲代代相傳」為主題，四個主題遊戲街除了愛心慈善街做慈善義賣籌款外，經典遊戲街、百變玩法街、材料幻變街會喺遮打道擺滿晒阿媽阿爺一代的大熱玩意，以及用簡單如砂煲等餐具創作的遊戲新招。
四種最經典：
去到經典遊戲街，絕不可錯過麻鷹捉雞仔、紅綠燈、跳橡筋繩及摺東南西北。
麻鷹捉雞仔：
雞媽媽保護小雞唔俾大麻鷹捉走，遊戲街當日有成三隻大麻鷹咁多，刺激度三級跳，為咗便於識別，小朋友可以着上「雞仔裝」，夠晒入戲！換個玩法，成群孫仔保護嫲嫲免被捉，三代都可以一齊玩。
紅綠燈：
「123，紅綠燈，過馬路，要小心」，好神奇，背住大家的「紅綠燈」念急口令，你只聽到嗦出來的「123」同「要小心」六個字，成排小朋友依舊撲前去捉住「紅綠燈」。當有人捉到「紅綠燈」後，他就會回過頭來捉大家，被捉到的就要當下一支「紅綠燈」。
跳橡筋繩：
「小皮球、香蕉油、那兒開花一十一……」勾繩花一直數至一百下，甚至玩連步舞，一條橡筋繩玩法多樣，阿爸阿媽們應該勉強記得，今日就教番小朋友玩。想當年奧運跳高最受歡迎，將條繩高舉過頭，3米助跑發力翻身一跳，後腳勾低橡筋繩完美着地！朋友們一致拍掌，嘩！簡直係10分最高殊榮呀！
摺東南西北：
「東南西北」算是比較多人認識的遊戲，小時候用來玩占卜，裏面寫滿惡毒的甜蜜的「繞操場單腳跳一圈」、「扮個最醜鬼臉」或「個個讚我靚」等等。
第一街 經典遊戲街
以前啲小朋友玩具唔多，只有玩伴如弟兄姐妹同朋友仔一齊玩麻鷹捉雞仔、紅綠燈、猜皇帝、橡筋繩等，講經典，當然唔少得呢啲百年集體遊戲。而活動當日預備了一棵小小的許願樹，讓大家寫下新一年的期望，另有圍棋、康樂棋等二十多個棋局，等你同爺爺過兩招！
跳橡筋繩
由最簡單膝頭哥高度跳起，層層升高！
摺東南西北
隨意挑一方向和數字，如「東五」，就將「東南西北」開合五次，按着東的指示照着做。
紅綠燈
當「紅綠燈」一轉身，大家硬係要擺個難度姿勢做定格，搖搖欲墜增加被捉機會。
第二街 百變玩法街
細個冇玩具玩，一卷廁紙都可以整廁紙花、濕水丟上天花板，待它乾透掉下來時掟中誰，誰就被大懲罰。百變玩法街有利用紙皮做的紙皮迷宮、坦克車及紙皮隧道；又有用竹紮出來的高轎、竹轎，甚至參與紮竹遊戲，天馬行空創作力大晒。
紙皮坦克車
將紙皮圈製成人力坦克車，小記有幸參與，發覺成班小朋友只管往前衝，你不跟着一起爬就實聽碌出「車」外，刺激與速度感真係激過過山車！
報紙十八變
日式摺紙都重有人玩，不過用報紙摺「拍拍紙」、飛得極遠的穿梭機、皇冠、馬騮上樹等就真係要阿嫲輩先至記得。一眾義工公公婆婆施展收埋幾十年的絕招，教你報紙百變大法！
百變橡筋板
用大頭釘及橡筋在水松板上設計迷宮，放波子鬥快走完迷宮。
第三街 材料幻變街
材料幻變街規模較大型，現在小孩子都可以去Band房學打鼓夾Band，家陣有用鍋子加水煲加鐵柱製成的樂器，其他還有用海綿，甚至拖鞋做的「波波池」，最古靈精怪莫過於此街。
HeavyMetalMusicShow
貨真價實的「重金屬」樂器呢！煎pan、鑊鏟、湯煲……終於有機會走出廚房見見世面，亦毋須被熏到一頭煙，條件是.……捱打。
車天車地
街上有單車、擔挑、假馬仔等，可以來個古今交通工具大比拼，鬥快載貨運人。父母們一見到支擔挑就實會攞嚟玩，可能對它們太有感情喇！
創新遊戲項目
黃昏遊戲結束之時，大會會邀請各位一起製作多條巨龍及小鳳，然後一齊唱歌「遊龍戲鳳」。另外又有義工會幫大家畫大花面貼印水紙。
遊戲街遊戲列表
第一街：經典遊戲街
中環許願樹（給你許願）
兩小無猜兒童國（摺飛機、踢毽子、摺東南西北）
經典遊戲巡禮（麻鷹捉雞仔、猜皇帝、紅綠燈、猜黑白）
棋藝龍虎會（圍棋、波子棋、康樂棋）
老少咸宜遊樂場（跳飛機、射波子等）
第二街：百變玩法街
紙皮迷城（含百變紙迷宮、紙皮坦克車、紙皮隧道等）
竹園村（含高轎、竹轎、創意紮竹遊戲）
中環小沙漠（中環街頭一個巨型沙池）
木仔樂園（含骨牌長城、木頭工作室）
橡筋王國（含射橡筋遊戲、跳橡筋繩、橡筋健身器）
泡泡世界（泡泡場上含繽紛肥皂泡、吹波波）
報紙十八變（可摺成紙帽、紙炮、小手袋、飛機等）
第三街：材料幻變街
扮嘢大滙串（裝扮成古今兩代美容院、百代歌神演唱會等角色扮演遊戲）
車天車地（單車、擔挑、馬仔等代步工具）
HeavyMetalMusicShow（鍋子、水煲、鐵柱及各種金屬零件做樂器）
古今小巧玩意大全（射叉、射飛鏢等小巧玩意）
塗鴉藝術館（用各種顏料畫圖，如水墨畫、用粉筆在地上繪畫）
怪怪波波池（海綿池、拖鞋池）
大會創新遊戲
遊龍戲鳳（團體大龍鳳創作）
動感擂台（跳彈床）
印水紙與花面貓（畫大花臉及印水紙）
第四街：愛心慈善街
慈善義賣（家居用品、嬰兒用品及健康食品等等）
飛越無限遊戲街2004
日期及時間：12月12日星期日1:00pm-6:00pm
地點：中環遮打道行人專用區 查詢：28982922
收費：費用全免