關心妍（Jade）噚日到商台接受《叱咤樂壇》訪問，佢一見馮仁昭就即刻話有件好嚴重嘅事發生，原來佢一直都有同阿媽參加嗰啲酒店優惠計劃，每年費用幾千蚊，除咗全年喺酒店食嘢有折頭外，亦都會有免費贈券，阿Jade因為好鍾意同媽咪周圍食嘢，所以就參加咗好幾個呢啲計劃。
阿Jade二十幾日前，就透過電話同某酒店職員續約傾談優惠計劃，由於阿Jade幾年來都係同呢個職員聯絡，所以佢就毫無戒心咁講咗信用卡號碼畀對方聽，隔咗幾日重未收到單據同贈券，所以佢就打畀酒店問，先知對方已經冇做。而酒店方面更表示唔係佢哋嘅責任，最慘係阿Jade發現張卡已經被人過咗成三萬幾蚊，搞到阿Jade好冇癮，惟有即時取消信用卡。
阿Jade話：「我相信唔止我一個俾人呃，但係我𠵱家未考慮報警住，信用卡公司話會調查，而媽咪會繼續聯絡個職員，如果再聯絡唔到先會諗報警，因為都想畀個機會對方，不過我最驚係對方有我哋啲個人資料，如果用嚟做假卡都唔知點算！」
自從黃霑一笑西去後，佢個女黃宇詩難免成為追訪對象，前日宇詩公開露面後，即成為追蹤對象，佢為撇甩記者重喺鬧巿衝紅燈，實在危險。噚日宇詩返到將軍澳電視廣播城開工，佢話：「我唔知咁多人跟我，以為可以撇甩大家，真係唔好意思，所以我決定呢排都唔揸車住，坐的士好啲。」
周星馳主演嘅電影《功夫》今個聖誕檔期上映，為咗配合電影主題，星爺最近親自構思監工設計咗一款新海報，搵嚟二十個男模特兒揸住斧頭追向星爺，經過加工，係威係勢咁。嚟緊星爺又會返廣州宣傳，重會大派呢張海報，相比之下香港嘅觀眾就冇咁好優惠，星爺上次喺香港宣傳已經俾人話過大細超，唔通今次佢又再嚟過？
混血名模Rosemary前晚去咗中環捧由模特兒設計嘅手袋騷，Rosemary入場唔夠五分鐘就走人，佢話：「我真係連袋都未見到，噚日我一日走四場，行咗兩個騷、兩個活動，媽咪話𠵱家幫我度聖誕檔期，諗到頭痛。」Rosemary重話希望將來都可以擁有自己嘅牌子，設計手袋或首飾。
黃子華噚日到港台接受由聽眾投票選出嘅「最受歡迎喜劇演員」獎，主持人陳淑蘭一見子華就大讚佢有一陣處男幽香，子華就回敬蘭子話：「因為我成日都靠住條柱拍戲嘛。」近日子華組咗隊band「哈痞」，重會喺明年年頭出碟，子華重一手一腳搞埋創作。
張衞健噚日到港台接受《娛樂滿天星》訪問，佢話忙完呢幾日《功夫足球》嘅宣傳後，佢就會同媽咪去馬爾代夫旅行。對於收視如何，唔會有太大壓力，無論點都會請一班老友食飯慶功，不過佢話最開心係呢套劇喺其他地方收視都報捷，重犀利到令新加坡一間弱台起死回生。
梁詠琪（GiGi）前晚接受商台訪問時透露稍後推出嘅新碟已邀請劉德華、陶喆、許冠傑同張敬軒等九位創作人作歌，佢話：「阿Sam之前同我上契，佢送咗首《親親我臉》畀我，佢都成日問我錄好首歌未。」GiGi重話張敬軒幫佢作嘅歌配上陳少琪嘅詞，內容好感人，GiGi話：「我唱到好傷心。」
