黃霑追思會，引來萬六人參加，唔知算唔算係香港最大型嘅追思會？黃霑係罕見嘅創作鬼才，佢自編自導身後事嘅安排，極見心思，試問有邊個已故大明星大歌星嘅身後事有咁多公眾人士參加，轟動一時？
十個黃霑生前友好致詞，兩位大國手嚴秉泉與梁智鴻好煽情，將追思會變成反吸煙大會。可惜天不假年，如果霑叔在生之時，拍番一輯反吸煙廣告片，效法尤伯連納，就認真造福人群矣。霑叔唔做中學老師之後，轉入商界，在「英美煙草」公司擔任要職，炮製「由頭到尾都咁好味」嘅香煙廣告，從此成名，佢嘅事業可以講係以煙草為平台，一彈而起，一飛沖天，但生命亦因吸煙太多，弄致肺癌，正是成也蕭何、敗也蕭何。陶傑幾日前喺專欄講「因果」，講「業」，煙仔與黃霑，係一個好好嘅通識教育題目。
左丁山與一班親戚圍在電視前睇直播，一致覺得上台致詞人士之中，陶傑講得最好，向政府高官及所有立法會議員示範咗如何用廣東話演講，可以講得幾動人。陶傑唔使睇稿，陳詞懇切，引用黃霑叔歌詞，十分切合佢要傳遞嘅情感，才子即係才子，唔到你唔服，睇嚟肚裏冇乜墨水，演講唔會叻得去邊，董特首與一眾高官及唔少立法會議員，照稿讀都唔多掂，都唔知佢哋搞邊科。當然，讀書多未必演講好，但唔讀書，演講就一定唔好。
追思會安排得幾順利，唯一令人不快嘅就係從新聞鏡頭之中，見到一啲人因攞唔到黃霑特刊而發爛渣，賴三賴四，其實市民到大球場追思霑叔，係表示尊敬尊重佢嘅創作，唔會志在攞本書，香港處處都有一啲貪心冇公德之人，好心佢哋唔好去追思會獻世啦。