啲人成日話英格蘭球壇嘅領隊就好似走馬燈咁，只要你一日唔好放棄，一日都有翻身機會，估唔到呢句話就喺失業咗一年有多嘅前英格蘭國家隊領隊荷杜身上應驗。因為佢喺星期二被正式委任為英冠聯球隊狼隊嘅領隊。
四十七歲嘅荷杜自從喺○三年九月俾英超球隊熱刺炒魷後，傳過可能會執教西布朗、修咸頓及紐卡素等英超球隊，又自薦去教法國國家隊，不過全部都衰咗。估唔到兜兜轉轉，最後成功執教狼隊，重同以前執教修咸頓時合作過嘅副手史超活格雷一齊再合作㖭！另外，喺荷杜○○年執教修咸頓時，佢係頂咗前領隊戴夫鍾斯個位，估唔到今次執教狼隊；狼隊之前嘅領隊又係戴夫鍾斯，都咪話唔巧合！
不過一句講晒，其實荷杜係有啲料嘅領隊，喺用人同戰術方面都幾有創意同大膽，但唔知點解成日因為其他同教波冇關嘅因素而衰收尾，希望佢今次帶狼隊時唔好再係咁啦！
阿仙奴嘅英格蘭中堅蘇甘保喺球場上一夫當關，但喺場外就被傳鍾意男人，而佢三十四歲嘅哥哥約翰因聽到佢同學高斯甸唱蘇甘保係基佬，於是教訓高斯甸，打甩對方幾隻牙㖭。蘇甘保被傳鍾意男人，已唔係今日嘅事，之所以有呢啲傳聞，全因佢將私生活收得太密及太鍾意打扮；但點都好，只要佢喺球場上有表現，話之佢鍾意男人定女人。
英格蘭名宿加斯居尼為咗上英國廣播電台一個聖誕特備節目，秘密學溜冰，點知唔小心撞親個頭，搞到要入醫院。雖然加斯居尼有運動底子，但話晒足球同溜冰完全唔同，加上佢成三十七歲人，身手同反應都肯定冇咁好，先會老貓燒鬚。聽聞如加斯居尼唔掂，英國廣播公司想搵施文頂，不過施文比加斯居尼重大四歲，所以佢真係要小心啲。
德國《圖片報》踢爆拜仁慕尼黑後衞沙奴爾長唞一個月之謎，話佢唔係喺練習時意外受傷，而係俾隊友波勒蓄意鏟傷。據講波勒因為唔滿意沙奴爾表現懶散，諗住教訓吓佢，點知用力過度。其實拜仁一向問題多多，球員之間成日有衝突，好耐之前李沙拉素試過同馬圖斯同埋尼高高華大打出手，睇嚟佢哋教練馬加夫要想辦法整治吓軍紀至得。