面對澳門仔何厚鏵多次掌摑挑釁，唐唐終於顯露強人作風，田少交波，唐唐勁射，就大嶼山開賭場問題意見多多，重話：開賭場，毋須經「中央」批准！
吓？咁樣公然伸隻手入澳門仔個飯碗內拿鹹魚食，澳門係阿胡最痛錫嘅孻仔，呢個月五歲生日，胡媽媽親自落濠江，同「小DD」吹蠟燭，重將會錫鏵仔面珠，懷着無窮嘅母愛，講一聲：乖乖，HappyBirthday！
可能係咁，做大佬嘅就眼紅，於是你搞賭場，我又跟住搞，學足大陸嗰隻一窩蜂，正如珠三角咁細地方，就搞足六個「國際機場」咁多！
最沙膽嘅，都係回應泛聯盟鬼仔謙嗰句質詢。鬼仔謙話：香港開設賭場影響澳門收益，要問過媽咪！唐唐一句就頂番轉頭：《基本法》規定，除外交及國防，其他事務由特區「高度自治」！
雙普選既不屬「外交」，又唔係「國防」，咁董團夥又唔敢「高度自治」？開賭場就毋須問「中央」？唐唐真係膽生毛！
大嶼山開個賭場，會吸納大量大陸貪官嘅黑金，從此大江南北，省市地方官，帶住一億幾千萬人民幣落嚟，一晚輸光，返上去，三兩個月之後就紮赴刑場槍斃，不但製造大量大陸孤兒寡婦，要由「國家」豢養，更導致大量中國國寶外流，大量貪官輸光再槍斃，分分鐘搞到大陸啲官員數量空前緊張，重唔係影響國防？
共產黨徒雖然自稱係用「特殊材料」所製造，不過一面臨輪盤同北姑，就會件件熔化！大嶼山開賭場，即是搶先腐蝕我國各級共幹，主動配合美國拉斯維加斯帝國主義勢力，摧我公僕，毀我長城，開賭場毋須「中央」批？冇錯，不過須要拉斯維加斯美國佬批啫！
唐唐話，開賭場，會製造大量教育水準低劣人士嘅就業職位，啱吖！大耳窿、馬伕、北姑、龜婆、叠馬仔，大嶼山一開咗賭場，拍住就會開埋夜總會，可憐滿山和尚寺、師姑庵，本來佛門清淨地，俾唐唐整啲酒色財氣攻一攻，連和尚師姑都冇心機念經，走晒過隔籬，唐唐重加罪惡滔天！
所以，反對開發大嶼山、堅決抵制開賭場，全港佛門弟子，守土有責。
唐唐挑戰澳門鏵、挑戰中央唔緊要，一定過唔過到我佛如來嗰關！
傳真︰2623-9278
電郵︰