有和黃（013）升1.75元照住，恒指跌幅輕微。大市有火車頭，欲罷不能，繼續係炒C輪着數。P輪，咪諗住。
滙控C輪4550：滙控（005）收134元，跌0.50元，但上升C輪多過下跌C輪好多。正股未動，C輪先行，滙控向上之勢未改。
4683炒聲震天，收39.5仙，升4仙（升11%），成交金額喺眾輪中排第6。另一隻C輪4687收40.5仙，升3仙（升8%）。炒輪規則有啲變，炒友向高槓桿率C輪埋手，博高回報。4683與4687都係呢類輪。
4550收50仙，升1仙（升2%）。要喺滙控高槓桿率C輪中搵食，呢隻係首選。同4683比較，4550壽命輸蝕兩個月，槓桿率又輸蝕啲（26.8倍對33.9倍），但溢價慳番4.4個百分點（7.4%減3%），着數晒有突。4683急升之後，就輪到呢隻中高度搏殺嘅4550。
中銀C輪9169：中銀（2388）收15.25元，冇郁。C輪9736大成交，升11%。9169收29.5仙，跌3%。正股炒落後，炒中銀C輪，9169啱晒。
9169明年2月到期，溢價0.5%，槓桿率5.2倍（有效4.8倍），引伸波幅30.2%，數據正斗。
章盛