八年前，法國人氣男星雲遜卡素（VincentCassel）同佢嘅意大利性感女星老婆莫妮卡貝露慈（MonicaBellucci），以及法國女星羅曼妮布寧格（RomaneBohringer）合演嘅《非常公寓》大受好評，最近荷李活型男佐斯哈尼特（JoshHartnett），同《木馬屠城》嘅戴安歌露嘉（DianeKruger）以及露絲拜恩（RoseByrne）就合演咗一齣《愛尋迷》，呢部電影正係由《非常公寓》改編，不過，故事背景就改喺芝加哥發生。
佐斯哈尼特喺《愛尋迷》入面扮演生活喺芝加哥WickerPark嘅青年馬修，有日佢偶遇由戴安歌露嘉飾演嘅莉莎，俾佢深深吸引，重開始跟蹤佢，最後兩人墮入愛河。但係之後莉莎無啦啦同佢分手，馬修大受打擊，黯然離開傷心地。
兩年後馬修重返芝加哥，準備結婚同埋到上海公幹，點知呢個時候竟然見番莉莎，佢決定放棄一切，追尋莉莎下落。而喺尋找嘅過程中，馬修邂逅由露絲拜恩飾演嘅神秘女郎雅麗絲，重發現雅麗絲隱藏住不可告人嘅秘密。雖然套片係荷李活版《非常公寓》，但就拍得夠懸疑，所以重被評為希治閣版嘅《叠影狂花》㖭。