港股噚日真係畀外資大戶玩晒。大市低開後，大戶抽高期指，挾高至14300水平就猛沽現貨，搞到恒指早市中段一度跌破14200水平，其後大戶再托住和黃（013），以免跌勢一發不可收拾。看來大戶正部署出貨，但究竟是短暫的套現換馬，還是覺得港股偏高沽貨離場，阿虎就唔清楚。
至於和黃逆市造好，Cookie話並非單係期指大戶玩嘢咁簡單，據講出售赫斯基單deal就快搞掂，市場估計未來重有好多分拆活動，故此招來唔少投資銀行買盤幫佢造勢。另外，和黃業務遍及全球，美元弱勢令和黃在滙兌方面大有斬獲，一波亦因此而調高其目標價至82元。
國企股則顯著受壓，鞍鋼（347）傳供股集資，股價急挫6.2%至3.775元，成交高達1.39億元。高盛調降美鋁投資評級，連帶中鋁（2600）亦受拖累，跌2.54%，與美鋁的跌幅不遑多讓。
中移動（941）新任董事長王建宙預期，發展3G需要投資逾千億元人民幣，當堂嚇親街坊，驚會影響電訊股派息，搞到中電信（728）下挫2.5%，中移動及網通（906）亦挫1%。要建一個3G網絡當然所費不菲，不過阿虎就唔信中國四大電訊集團各自建網咁浪費，如果由四大電訊集團共享一個3G網，每個集團只須支付300億元左右。
近排新股乃市場焦點，利和（2387）首日上市最高升至4.60元，收報4.35元，較招股價3.50元，高逾24%，成交4.38億元，可算售後服務做到足。
阿虎