民主黨將於周日改選新領導層，情況異常熱烈，唔止主席一職首次出現差額選舉，候選人包括陳竟明同李永達，兩個副主席又有三位候選人競爭，連中委選舉都比往屆激烈，共有四十四份表格提名角逐二十七個剩下嘅中委會委員席位，年輕黨員紛紛積極參與，共有四位黨齡少於三年嘅候選人。
兩年前嘅改選，除咗正、副主席喺冇對手情況下當選外，成個中委都係等額選舉，即係只得三十位候選人報名角逐三十個中委席位。但今年情況完全改觀，現任立法會議員中只有張文光冇報名尋求連任中委，報名人數則比上屆多咗十六人，前匯點派系如狄志遠等踴躍參與，連早前同華叔爆發筆戰、一度想退黨嘅前中委馮煒光都有份選中委。陳竟明同時提交三份報名表，參選主席、副主席及中委；李永達則只參選主席，一旦落選就會做番普通黨員。
傳真︰2623-9278
電郵︰