唔少港人深信風水，所以買樓前都會搵風水師睇吓，若果單位風水配合自己，就算畀貴啲都冇所謂。
通常豪宅買家最肯畀錢請風水師睇樓，但估唔到，原來連百零萬嘅居屋單位，都有買家請風水師睇風水。
世紀二十一李志江話，藍田一個居屋客，啱啱賣咗持有嘅康雅苑八百二十呎單位後，諗住換同區私樓，重請咗城中出名嘅蘇姓風水師幫手，揀出區內好風水嘅物業。但係睇咗好耐，都搵唔到啱心水單位，後尾連居屋都睇埋。
風水師話，喺康雅苑隔籬嘅居屋康栢苑，B座高層二室，單位有海景，樣樣都夾佢，幾乎畀到滿分咁滯。個客於是同業主傾價至深夜，終於以自由市場價一百七十八萬成交，單位七百一十呎，呎價二千五，高同類單位市價一成。
信和屯門市廣場人流量極高，其中三成係十八至二十八歲後生仔，為咗針對呢班年輕消費者，信和希望個場可以賣啲跟得上潮流嘅物品，所以將商場一期二樓闢做「潮流堡」，共有十個面積約三十三呎嘅流動展銷亭，月租六千蚊起，專賣啲至潮至in嘅物品。
信和陳欽玲話，「潮流堡」設計同顏色都比商場內嘅車仔檔in，租金又平啲，所以租客要帶埋產品畀佢哋睇過，佢哋認為滿意至肯出租，暫未定優惠期至幾時完。
通訊發達，令到好多以前好難搞嘅嘢，都變得好容易搞掂，連隔山買賣物業都一樣方便。一個長住澳洲嘅業主，就係透過電郵，同本港代理聯絡，最後成功賣出灣仔星域軒一座中層一千一百五十八呎A單位。
中原程仲雄話，個業主長期喺澳洲，佢放售嘅單位，一直都係靠電郵聯絡溝通。日前有個灣仔換樓客有意買入，但出價比業主開價一千零四十萬低，雙方透過電郵講價，最後以九百八十萬成交。
業主持貨五年，賺近百八萬，件貨升值兩成二。
戴德梁行向來預測樓市好嚴肅，不過，戴德梁行研究部陶汝鴻噚日罕有地搞搞新意思，竟然攞個半山指標豪宅帝景園，與中環甲級寫字樓比較，用幽默嘅手法，估計寫字樓價格出年升幅。
佢話，甲級寫字樓，因為存在好多投機元素，好難預測出年樓價升幅。但行內有時愛用帝景園，與皇后大道中九號呎價做比較，因為喺過去樓市高峯期，呢兩個唔同市場嘅指標物業，呎價追來追去。現時帝景園呎價萬一、二，皇九重做緊九千三，落後兩成有多。以追落後概念分析，甲級寫字樓，價格隨時有兩成升幅都唔出奇。
香港按揭證券公司將按揭保險受保範圍，擴大至再融資按保，為業主提供加按套現機會，滙豐銀行噚日即時出招吸客，推出「加按轉按」計劃，喺下月十日前成功申請，並喺明年五月底或之前提取貸款，就可以獲得十五萬分滙豐信用卡獎賞積分，用嚟換取禮品。
滙豐話，最高按揭成數係樓價八成半，貸款額上限五百萬，還款年期十至二十五年，轉按與加按都可以。從滙豐嘅出手，可見樓按市場競爭都唔細。
電郵地址：
