近排香港愈嚟愈多事，尤其愈近年尾，是非就愈多，紅灣、西九、房委會分拆領匯基金等，都係政客大好表演機會。成日俾人講閒話，班地產商自然唔多高興，前日恒基地產主席李兆基（四叔）已經講話唔想咁多糾紛，佢重話，「我跟胡錦濤講，我哋大家要和氣，唔好咁多鬥爭，香港應該要大家團結……和氣生財。」
噚日彤叔鄭裕彤被人問到有乜新年願望時，不約而同、有感而發咁話：「新年願望最緊要香港唔好咁多爭拗，繁榮安定就最好。個個都搵到兩餐，身體又健康。」咁係咪覺得𠵱家香港爭拗太多呢？佢話：「唔係，只係少爭拗，香港就自動好。家和萬事興，家衰口不停。」
講開呢兩位地產孖寶，其實好老友，好似前日四叔明撐新創建拆紅灣半島單嘢，彤叔就似熟賣熟：「四叔唔係幫我，若果佢講得唔啱，你哋都會吠佢啦！」
傳真︰2623-9278
電郵︰