林子祥（阿Lam）平時畀人嘅印象沉默寡言，但其實好風趣幽默，前晚佢同譚詠麟（阿倫）喺中環做雷有暉（Patrick）嘅音樂會表演嘉賓，估唔到阿Lam一上台就語出驚人。
阿Lam同Patrick上台jam歌時，忽然間話：「今日好難得請到我同阿倫一齊嚟，一個『諗（林）』樣，一個『倫』樣，一齊唱歌。」阿Lam講完即刻掩住個嘴偷笑，搞到Patrick好尷尬咁打圓場話：「佢成日都口快快。」
前晚Patrick嘅老婆同囝囝都有嚟捧場，佢唱到首作畀個仔嘅歌曲《爸爸》時，重抱埋個仔唱歌，佢個仔好似原島大地咁可愛。Patrick曾經同李麗珍拍過拖，佢話睇過《珍人真事》，但只係睇咗關於自己嗰部份，Patrick話：「希望快啲搞掂啲嘢啦，最唔好係影響到仔女，我會祝福馬太同珍妹嘅。」
此外，阿倫噚日接受電台訪問時話呢個月中會出新碟，今次重搵咗好多資深創作人幫手，好似潘源良咁，問佢有冇搵過黃霑？阿倫話：「有呀，不過佢嗰時唔舒服做唔到嘢，所以我都有啲遺憾。」講到梅媽話唔夠錢使，阿倫就好抵死咁話：「最緊要量力而為，我都唔知點答好，都係繼續呼吸啦。」
官恩娜同房祖名傳緋聞，佢哋出席公開場合時，雖然話唔介意同對方合照，但祖名好明顯口不對心，成日避開官恩娜。噚日官恩娜喺尖沙嘴出席活動時，終於唔使同祖名碰頭，因為對方冇出席，官恩娜唔單止好早到場，笑容重比平時燦爛，唔知係咪冇緋聞男友在場就自在好多呢？
陳冠希、吳建豪同古天樂等紅星近期拍攝由杜琪峰執導、以單車為題材嘅迷你電影，佢哋飾演單車好手，導演重請嚟香港單車好手洪松蔭做指導。部戲呢個月二十號喺灣仔會展舉行首映音樂會，收益會撥捐香港青年協會及龍傳基金。其實呢套戲已經拍好，古仔佢哋呢個禮拜會錄埋音㖭！
吳宇森噚日喺台灣宣傳，大談喺荷李活發展遇到嘅辛酸，佢話嗰邊競爭好劇烈，承受好多壓力。
吳宇森重公開多謝太太默默支持佢，又話最安慰係兩個女都熱愛電影，大女尚方鍾意寫劇本，二女飛霞就鍾意拍藝術電影，佢哋都肯繼承佢嘅衣鉢㖭。
成龍同譚耀文近排喺北京趕戲，佢哋拍攝一場騎馬戲時雙雙墮馬，成龍整傷咗腰骨，要工作人員抬佢返酒店休息。與此同時，成龍獲悉有份主演嘅電影《新警察故事》喺台灣金馬獎攞到四個獎時，即刻覺得痛苦減輕咗。對於一手發掘嘅吳彥祖得到金馬獎「最佳男配角」，成龍話戥對方開心。
