中環AIGTower星期四平頂，就咁講大家可能唔知係邊間商廈，但若果話中環富麗華酒店大家就「乜都返晒嚟」。呢間就嚟平頂嘅商廈，當年差啲令麗新發展林建岳「沒頂」。
九七年回歸前夕，岳少以六十九億元「摸頂」向傅氏家族買入富麗華，諗住同隔鄰麗嘉酒店合併發展，但大計搞唔成，反而搞到麗展孭巨債，要變賣資產，○○年嘉德置地（當時名為百騰置業）同美國AIG合資十八億八千萬，向麗展買入六成半富麗華重建後寫字樓業權。
講開嘉德置地，佢係由星洲政府擁有，前身係物業重建部，專門投資物業，除咗低價買富麗華，最新發展係成為領匯嘅策略夥伴，每年收千幾萬顧問費之餘，你班散戶喺度擔心究竟抽到幾多手領匯時，佢就「坐定粒六」一定分到超過二十六萬手（約一億三千股）領匯。
不過，你又要諗，人哋當年最低價買富麗華，重建完成個市咁啱又旺番，時機睇到咁準，佢肯醒番兩招畀領匯，領匯「準股東」都唔介意畀咁高顧問費嘅，吓嘩！
（圖）昔日嘅富麗華酒店真係好令人懷念。資料圖片
傳真︰2623-9278
電郵︰