與老友T食完晚飯，老友Tcall的士到中環萬宜大廈，載我哋去九龍。的士五分鐘之內到，非常方便。上咗的士，本想瞌眼瞓，點知雜聲吵耳，由頭到尾都咁好味，真係杰。原來司機大顯神功，左右耳朵貼上耳筒，車內司機座位有兩部手機，軚盤隔籬有一部PDA，司機一路揸車，一路接call車柯打，一路打電話指揮其他司機去邊度邊度接客。客人十分多，一啲去渣甸山，一啲去觀塘，一個喺大埔工業邨，再嚟一個喺沙田新田圍。老友T話：「唉吔，乜call到架總司令嘅車，有排嘈。」
呢架係八折的士，左丁山一路坐，一路驚。驚總司令太分心，又討厭佢嘅電話不停響，佢個大嘴巴不停張開鬼殺咁嘈，雖然話係八折的士，但慳番嗰兩成的士費，抵銷唔到嗰種不舒服感覺。
但係八折的士生意睇嚟真係好好，咁多人打電話call的士嘅，唔怪得畢打街置地廣場旁邊，過海的士大排長龍啦。呢日接到一位讀者黎先生嘅傳真，黎先生話：「希望廖秀冬局長看到，就是的士要減價，現在的士咪錶起錶十五元照舊，跳錶呢，五十元之前每跳一元四角，但五十元之後咪錶每跳降至一元，減四毫。這樣既可減價招生意，又可打擊犯法（八折）的司機，使的士司機在公平環境中搵食。」
呢個方法，最益長程乘客（例如由中環去沙田），短程客冇乜得益。一般嚟講，call八折的士嘅，多數係長程客，此法可以幫吓啲「非八折」的士。廖局長高高在上，出入有寶馬七系接送，唔知坐過八折的士未，左丁山坐過幾次（自己唔識call，老友call晒），次次覺得司機太忙碌，一眼關七，做一更可能等於人哋做兩更咁攰，對乘客安全點都冇咁好。此乃經濟問題，望廖局長多多注意，准的士減價。