領匯（2382）的吸水大法開始令大市感到壓力，噚日港股成交急降至153.44億元，幸而恒指未有因此而大跌，反覆上升45點，收報14256點。
領匯是次招股集資237億元，10%供散戶認購，若果有100倍超購，將相當於2370億元，大約十多個交易日成交額，但相信超購倍數應遠超100倍。阿虎覺得今次領匯招股若錄得空前的認購額，肯定要多謝鄭大班。
新創建（659）旗下紅灣半島拆卸風波沒完沒了，就算順利拆卸重建，亦可能被政府追收補地價，以及面對樓市數年後可能出現逆轉的風險。新創建噚日跌2.06%，收報11.85元。純官噚日評論紅灣半島時形容：「…將一啲唔好睇嘅嘢拆除…」唔知純官知唔知香港有幾多人住緊居屋呢？呢句話可能會得罪唔少香港人，紅灣半島風波相信重有排玩。
聯想（992）早前多次傳出與IBM有合作，消息曾刺激聯想於急升至3.125元，但其後因為冇下文而回軟。該股噚日停牌，公司話有股價敏感消息公布，因有報道話聯想會用10-20億美元收購IBM電腦業務。不過，業界對此項交易唔係睇得咁好，摩根大通話有關業務利潤微薄，兼且涉資龐大，可能導致每股權益被攤薄。
香港通訊（248）噚日復牌，股價勁升29.79%至0.305元，市值升至1.37億元。公司以1.8億元出售灣仔聯新大樓及通訊大廈全幢獲利逾億元，套現所得扣除成本及償還2800萬按揭，有1.5億元作為營運資金，唔挾高就奇。
阿虎