澳門特首何厚鏵，繼在施政報告之中發出反浮誇口號，搶先掌摑董建華之後，澳門又有新攻勢，就係宣布一連串保舊立新大行動，宣布：進一步保留葡國殖民地領導時期舊建築，保留殖民地四百年美好優質回憶，同時興建澳珠海底隧道，重有漁人碼頭㖭噃！
針對董團夥七年半來種種吹水浮誇嘅幼稚行為，何厚鏵又幾好彩，有一個愚蠢到無倫嘅董班子，隔海俾佢做反面示範單位，總之董班子行東，何厚鏵就行西；董團夥話行左，何厚鏵就行右；董建華搏命吹水，何厚鏵就收聲密食當三番，咁就冇錯！
澳門主權移交五年，何厚鏵同老董對衝住嚟玩，真係大見成效！董團夥及特區土共分子，出於民族自卑心理，對英殖民地時代嘅舊建築，充滿變態仇恨心理，又話要拆除兵頭花園銅像，換一個孫中山像，又要拆甘棠第，又要拆中區警署，以為拆清以前啲舊嘢，就等同佢自己當家作主！
何厚鏵心水清，對於董共集團嘅愚行，一眼睇穿！尤其係董團夥死剩把口，講就天花龍鳳，做就虛無空洞嘅中國式假大空作風，引以為戒，現時宣布再發力，留舊迎新，步步正確，箸箸夾中，董團夥相形之下，氣急敗壞，有如一窩喪家之犬！
追倫敦、趕紐約，早成千古笑談，嗱，團夥𠵱家終於想超澳門、趕氹仔咯喎！唐唐做媒，由自由黨田少建議，離島區議會一批農民議員附和，竟然想喺大嶼山起賭場，鬥澳門唔過，實行抄橋明搶客，都咪話唔卑劣喎！
跟住又話要起高爾夫球場，又話起賽車場，毫無創意，珠三角同澳門有咗嘅嘢，董團夥又想有！樣樣都係消費型嘅大工程，咁重使乜「經濟轉型」呢？董團夥輸足七年半，經已係一個輸紅雙眼嘅賭徒，力竭聲嘶，精神錯亂，將最後嘅賭本大嶼山，瘋狂推出，其五官之扭曲，都咪話唔恐怖！
不過，又講番轉頭。董團夥七年半以來，夠講過喺大嶼山寶蓮寺起登山吊車喇，又係吹水，遲至今日，吊車？幾篤牛屎就有！
抄襲澳門，跟風搶客，何厚鏵若果任你老董只抄功課撿便宜，重使做特首嘅？十二月二十日，老胡訪問澳門，係都過門而不入董特區，老董真係要認真檢討。
傳真︰2623-9278
電郵︰