呢期頻頻出現公開場合嘅董太真係挑通眼眉，知道近排興文化藝術，所以噚日就去咗欣賞本地十八位藝術家喺香港國際機場客運大樓展出嘅作品，同一系列園藝盆景。呢批藝術品包括木刻、金屬雕刻、陶器，喺客運大樓中央客運廊沿途陳列，董太一路戴住副墨鏡，一路手指指啲藝術品，真係好有品味……
講開董太，八方隨手揭吓本《董浩雲的世界》，發現有啲內容都幾有趣，其中一封董太寫畀老爺董浩雲嘅信，爆咗一個小秘密，原來董建華個仔董立新，細個時小便有啲問題。
董太喺封信度講，立新個腎有啲問題，不過食過朋友介紹嘅家傳秘方，小便好似奇迹咁差唔多全部回復正常，唔使再去紐約搵兒科醫生啦！道秘方就係，每日飲一碗矮瓜燒紅棗湯，份量係六個Eggplant（矮瓜）加十粒紅棗。
董太原來重好關心股市，佢重喺封信嘅埋尾提到，股市偏軟，當時叫東方貨櫃嘅東方海外，股價重係徘徊喺三個二左右。今時今日，東方海外嘅股價去到三十蚊，董太唔使再好似以前咁擔心啦！
（圖）董太（右）噚日到香港國際機場欣賞由本地藝術家創作嘅藝術品，喺呢個moment佢嘅文化氣息真係要爆喇！ 黃賢創攝
傳真︰2623-9278
電郵︰