荷李活女星雲妮絲惠嘉（ReneeZellweger）最近馬不停蹄咁喺世界各地宣傳佢套新片《BJ單身日記：愛你不愛你》，佢前日就由台灣趕到去韓國，真係想停低唞吓都唔得，而部片喺全球上映二十五日，票房已經突破咗一億美元，即係有成七億八千萬港元，總算飲得杯落啦。
雲妮絲惠嘉噚日一早就喺漢城出席《BJ》嘅記者會，聽講現年三十五歲嘅雲妮，原來係第一位到南韓宣傳嘅荷李活女星，所以噚日嘅記者會非常墟冚，可想而知佢幾受注目，而雲妮自己都認為電影裏面嘅BJ都好受人愛戴。
着住件黑色boatnecktop長袖衫同牛仔褲出現嘅雲妮話：「因為世界上有好多人鍾意BJ呢個角色，我唔想令大家失望，再加上自己都好喜歡BJ，所以我先決定再拍呢套戲嘅續集。」雲妮重話佢接到續集嘅劇本嗰陣，真係睇得好興奮，闊別三年再做BJ嘅佢話：「今集嘅BJ會變得更加聰明，冇以前咁幼稚、咁樂觀，但係佢嘅皮膚已經比以前好咗好多。」完成亞洲宣傳之旅後，雲妮又要開始投入拍攝新片《PieceofMyHeart》。