自從上星期三立法會上演議員狂轟政府賤賣資產，益外人唔益香港市民後，領匯（2382）的魅力即刻變得沒法擋，近日收到唔少親朋戚友電話，都係問領匯買唔買得過及認購手續。
至於領匯買唔買得過？趙飛雲一向冇認購新股習慣，一來怕填表，二來好嘢唔會分得多，一手半手作用唔大，不過唔怕麻煩應該可以賺餐茶。至於長線作收息持有，趙飛雲就覺得如果大家睇好樓市及租務市場的前景，可能等太古A（019）及新地（016）回吐時吸納更有值博率，若樓市向好，估計回報不會跑輸領匯。
油價10月尾見頂後展開尋底之旅，不但國泰（293）回升，母公司太A受惠地產及租務市場復甦，升勢更是凌厲，由53元升到近日65元水平，累積升幅高達22%，太A昨收64.75元，是97年10月以來新高。
太A近期升幅大，技術上頗為超買，日線圖的9RSI亦出現背馳訊號，不排除短期會受制於65-67元，出現短線回吐，但只要後抽守穩60元，短中線仍是反覆向上的走勢，上望77元。
若由月線圖看，太A走勢更是吸引，11月尾升破97年至今長期阻力軌60元，為一重大突破訊號，未來兩三個月，股價有可能在60-67元水平造旗整固，然後配合業績公布破位而上。太A現價往績PE20.15倍，預測15.96倍，只要稍有驚喜，要見77元並非太難。無論作短線炒賣或長線持有，太A60元都是一個關鍵位，回近不破可先買第1注。要留意是國泰佔太A盈利比重頗大，持有太A，要同時昅實國泰表現。
趙飛雲