上周細價股唔多掂，但噚日突然出現強力反彈，今次炒上的動力，似乎係來自老虎仔的遠東發展（035）。遠展上周連跌多日，幾乎重返起步位2.60至2.70元水平，但噚日一條氣衝番上3元水平，大升11.11％，收復之前大部份失地，果然厲害。
遠展將於周四公布中期業績，單睇佢年初出售物業大有斬獲，斷估表現唔會差。
除咗老虎仔之外，獲股壇長毛品題做聖誕禮物的嘉利國際（1050），昨日亦表現神勇，最高見過3.20元，收2.90元，勁升13.73％。不過，經紀黃冇向小初推介嘉利，而係推介一隻以前長毛亦品題過嘅信星集團（1170）。
信星向來係基金股，但因為原料上升同其他原因，令盈利有多少倒退，但據講近半年業績已經有改善，但信星現價只得2元，係全年低位。隻股將在下周四公布中期業績，應該唔會太失禮，加上派息往績佳，信星其實有得諗。信星昨日收2元，冇起跌。
慕容小初