我求大俠細細個睇波時，已成日聽到「英格蘭足總盃係爆冷溫床」呢句話，不過，𠵱家可能要改為「英格蘭足總盃係弱隊求生嘅溫床」。點解咁講？因為經過星期日嘅英格蘭足總盃第三圈抽籤後，非聯賽隊伍埃克塞特抽到作客英超班霸曼聯，佢哋嘅球會高層重開心過中六合彩，話呢場喺出年一月八日或九日舉行嘅賽事，起碼可以為佢哋帶嚟保守估計五十萬鎊（約七百五十萬港元）嘅收益，確保球會未來三十年嘅存活！認真誇張。
至於另一支非聯賽隊伍葉丁，雖然佢哋都抽中對英超聯強隊紐卡素，不過就冇咁好彩，因為佢哋喺自己坐得三千人嘅主場迎戰。自從非聯賽隊費恩堡喺兩季前抽到主場對阿仙奴而私自改為作客「兵工廠」賺錢後，英足總就改制，唔畀球會私自改主客場地，令到葉丁見財化水。
意大利聯賽入波後除衫慶祝會被罰黃牌，你知、我知，斷估前日幫祖雲達斯入波嘅奧利華拉同伊巴謙莫域無可能唔知，但佢哋同夜場森多利亞嘅柏根奴一樣明知故犯，視王法如無物，入波後懶型咁除衫慶祝。其他兩個少正選同入波，過份興奮可以諒解；但「伊巴」係祖記前線主將，隊波前鋒兵源又唔多夠，咁樣整張牌唔多化算喎！
今季無甚表現嘅丹麥翼鋒羅美度，日前對水晶宮喺補時射入奠勝一球，幫查爾頓第二次喺聯賽作客贏波。羅美度賽後就話當時起腳怒射，自己都係瞌埋眼博一博，點知就咁個波向死角飛埋去入咗，連佢都話好彩。可憐水晶宮射極都唔入，已經入咗九球嘅射手安迪莊臣連十二碼都宴客，人哋羅美度瞌埋眼起腳反而有得入，認真冇計！
今年可以話係國米射手阿祖安奴嘅豐收年，由夏天美洲國家盃到家陣都重係入波停不了。雖然佢無緣成為今年世界足球先生選舉嘅三個候選人之一，不過早幾日就獲意大利傳媒頒發一個「金球獎」。呢個獎當然唔可以同《法國足球》頒嘅「金球獎」或者世足先生榮銜相比，但總算力壓其他出色嘅意甲聯球星，算係個安慰獎囉！