薄扶林貝沙灣裝成高尚豪宅，宣傳與推廣浪接浪，今次配合第六座即將開售，盈大首度改為用中國人相信嘅風水做賣點。
樓盤啱啱至攞到測量師學會頒發最佳市場推廣大獎。
成個貝沙灣項目佔地廣闊，盈大話，第三期各座中，第六座面向正南方多啲，合乎普遍買家愛揀坐北向南單位嘅喜好。
發展商噚日專程帶傳媒去到數碼港現址嘅酒店，望住海面嚟講解。
盈大營業經理莊賢文話，第六座景觀廣闊，左面係瀑布灣及火藥洲；對面係索罟灣、鹿洲灣與榕樹灣，而左右兩邊嘅東西博寮海峽，海水好似湧向第六座咁款，堪稱八個荷包聚財之地。
其實，係咪風水格局影響就見仁見智，但係貝沙灣第一期買家，喺近一年多樓市升浪中，荷包就肯定脹咗。
上個禮拜，西灣河嘉亨灣推出租金回報保證計劃，恒基營業部助理總經理林達民聲稱，回報高過啱啱開始認購嘅領匯多多聲。
為咗令大家更了解呢個產品，佢噚日喺中原記者會上客串做講師，好認真咁準備定箱頭筆同埋臨時黑板，利用簡單嘅方程式講解，邊寫邊解釋，講師形象入型入格，幾可亂真。
佢嘅計法係，買家畀一成首期，每年就有五厘回報，扣埋利息支出都有兩厘半，相對投入嘅資金，回報有兩成半。林達民話，比起其他投資工具，好似剛開始招股嘅領匯，一年都係得六七厘回報，嘉亨灣實高過佢。而且，領匯重好多人爭，分唔到幾多，嘉亨灣就有貨畀買家任揀，梗係吸引啲。
繼元朗YOHOTown有蝕讓後，噚日輪到東涌映灣園，而且連續有兩宗。七座中層C，七百三十呎，以一百八十萬轉手，蝕五萬五。同座同碼高層F，炒家以一百九十萬摸出，輸六萬八。
利記劉俊傑話，映灣園突然多咗炒家出貨，搞到呎價下跌七巴仙，得番二千五百六。美記曹志剛話，投資者唔想上會，所以平啲散貨。睇嚟用家有機執平貨。
炒家一出貨，即刻拖低屋苑造價，威力認真唔講得笑，映灣園三期一手可能會有啲壓力。
旺角朗豪坊入伙後，區內業主頻頻借勢放售物業，就算離朗豪坊幾條街嘅廣東道九六八至九七○號商住樓，都委託中記標售，目標價二千八百萬，出年一月十九號截標。
全幢樓面萬五呎，地舖千八呎，月租兩萬五，樓上住宅每月收租四萬八，以二千八百萬計，回報率約三厘，呎價超過千八，能否接受，由買家決定。
蘭西記得，資深投資者馮國保，九月以五千二萬賣出砵蘭街偉來商業大廈，呎價大約千五，半年賺千幾萬，或多或少都受惠於朗豪坊效應。
經濟好轉，唔少公司擴充，對寫字樓需求增加。九倉葵涌工貿樓都會坊，受到唔少本地公司垂青。九倉發言人話，都會坊噚日有兩間公司買入全層。
貿易公司用一千八百萬購二十一樓，萬四呎，呎價近千三。同時物流公司以一千九百萬，買入樓上二十二樓，呎價一千三百六。
成幢都會坊，先後吸引唔少行業進駐，例如有製作數碼影碟，亦有不少公司，當作工作坊或創作室，𠵱家得二十三樓同埋二十五樓可供出售，整個項目二十四萬呎樓面，賣出九成。
電郵地址：
