全球期待SONY部PSP，50萬套定單一早Full晒，貨源極為緊張。就喺全人類準備12月12日四出撲貨之際，當中有500套居然喺兩日前悄悄流出市面，比正式發售日早成個禮拜！《爆機狂迷》曾多次介紹過PSP嘅試玩報告，今日更率先為大家剖析正式版PSP嘅真面目！
記者：徐影龍
其實呢500套PSP並非不法嘅「老鼠貨」，而係早前SONY為出手義助剛受地震影響嘅日本新潟縣，拎出500套PSP出嚟作暗標競投，收益就撥捐賑災之用。呢500套PSP最值錢地方，除咗比正式發賣日早一個禮拜派貨外，重會將你指定嘅語句燒錄喺PSP嘅資料ROM內！即係開機後會見到一張感謝狀，入面有你個名同編號，絕對係全球獨家！難怪標到頭籌嘅機迷，足足用咗成2萬6千蚊港紙！
星爺現身試機碟
講完賑災版PSP後，再介紹吓正式版跟機配套。不論齋機版或ValuePack，都會跟一隻《DemoDiscVol.1》，呢隻UMD試機碟，以聽同睇嘅多媒體為主，當中電影部份居然出現《功夫》預告片！星爺呢趟真係為港爭光！其他預告片重有《生化危機2》及《狐忍》，遊戲預覽就有《全民高爾夫》、《真．三國無雙》等，再加5首音樂，合共24條Track。
睇戲唔使買UMD
經證實後，發覺官方冇講嘅MSDuoPro都支援，佢唔單止可Save遊戲，而且重支援數碼相片同MPEG4播放！SONY更會喺年尾開放MPEG4轉換軟件畀用家下載，即大家唔使用又細又貴嘅UMD碟！最後一提係PSP嘅全球性充電器為100-240v世界牛，而操控介面亦兼具英、日顯示，極盡方便。
