新股上市，掀起認購熱潮，今次有隻「實賺」嘅領匯（2382），相信會打破晒香港有史以來嘅紀錄，噚日銀行已紛紛「拉閘」，即係唔再借錢，就算之前已落咗口頭柯打嘅大客，融資個數亦都要打個折扣。重有，到噚日為止，銀行亦未定到個息口。
大市喺高位反覆，同資金湧去申請新股有關，噚日成交已縮到只得153億元，係一個多月來嘅低紀錄，相信領匯資金未回籠之前，個市都係牛皮向上，唔會大升。後市點睇？月中之後，港股有機會升多一轉，但會在15000之前回頭。
創維（751）事件影響都幾廣泛，因為唔少基金中招，為咗要「填數」，上個禮拜，就有唔少基金股「無情情」被拋售。最新嘅消息，係創維事件並唔係想像中咁嚴重，且好有可能喺短期內復牌；芬佬個心一定，知道個「傷口」唔會好大，於是又再買番轉頭；結果，上周五大跌嘅基金股，噚日又大幅上升。銀建（171）同遠東發展（035）最明顯，前者收4.30元，升8.8%；後者重上3元大關，升11.1%。重有，基金一路睇好嘅信德（242），以高價7.60元收市，升4.8%，佢哋嘅目標價係20元過外。
德信科技（1228）噚日成交有異動，由上周五的58萬股大增到1137萬股，聽講係有基金上車，而且個「嘥士」唔細。德科喺0.32元至0.37元水平，已牛皮整固成4個月，今日再升，即可確認突破10日同20日線，開展中期升浪。
德科主力生產計數機，係全球最大嘅製造商，今年開始推出好多功能防水手表同STN液晶體顯示屏，銷售亦好理想。
為應付需求，集團已部署在湖南同河南等內陸省分，建立新生產基地，預計兩個月後可完成裝配，並會招請5000員工，由於薪金較低，有利集團降低生產成本及提高毛利率。
新廠投產後，預料計算機產量可倍增，由現時每日38萬隻增至70萬隻，而多功能防水表產量亦會由現時每月75萬隻增至300萬隻。
德科04年度（12月年結）上半年獲利5050萬元，升101%，保守估計全年賺1.1億元，每股盈利7.6仙。05年，新廠房落成，估計盈利可上升至1.67億元，每股盈利11.5仙，預期PE僅3倍！
郭兆誠